Аввал хабар берганимиздек, жорий йилнинг 25 ноябрь кунидан 10 декабргача Тошкентда “Зўравонликка қарши 16 кунлик фаол ҳаракат” глобал кампанияси бошланди.

Шу муносабат билан Пойтахтимизнинг Сергели туманида Тошкент шаҳар Ички ишлар бош бошқармаси ҳамда Ижтимоий ҳимоя миллий агентлиги ҳамкорликда “Биз зўравонликка қаршимиз!” шиори остида тадбир ташкил этилди. Унда ҳудуддаги 50 нафар низоли ва ярашиб кетган оилаларнинг аъзолари таклиф этилди. Шунингдек, тадбирда кам таъминланган, ижтимоий кўмакка мухтож хотин-қизлар ҳам иштирок этди.

Мақсад оилавий зўравонликка қарши бирлашиб ҳаракат қилиш, низоли оилаларнинг муаммоларини ўрганиб, уларнинг фаровонлигини таъминлашга ҳисса қўшиш, оилавий ажримлар сонини камайтириш, низоли оилаларни яраштиришдан иборатдир. 

Тадбир доирасида Ўзбекистонда аёлларга нисбатан зўравонликнинг олдини олиш, зўравонлик қурбонларини реабилитация қилиш бўйича қилинаётган ишларга бағишланган ролик намойиш этилди. 

Учрашув давомида ички ишлар органлари масъул ходимлари, таниқли санъаткорлар сўзга чиқиб, барчани зўравонликни олдини олишга ва жабрланганларни қўллаб-қувватлаш учун ҳамкорлик қилишга, хотин-қизларни бу борада фаол бўлишга чорлашди. 

Шу куни маҳаллада аввал низоли бўлган кейинчалик ярашиб кетган, намунали оилалар сафидан жой олган аёллар ва бу борада соғлом муҳит яратишга ҳисса қўшган хотин-қизлар фаоллари рағбатлантирилди. 

Санъаткорлар ижросидаги жонли қўшиқ ва рақслар файзли тадбирга якун ясади. 

<iframe width="650" height="420" src="https://www.youtube.com/embed/sAbVwUfHstw" title="Zoʻravonlikka qarshi faol 16 kun" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Аслиддин Алижонов, Анвар Аҳмедов, ЎзА