25 ноябрь — Хотин-қизларга нисбатан зўравонликка барҳам бериш халқаро куни. Бу сана 1999 йилда БМТ Бош Ассамблеяси томонидан аёлларга нисбатан зўравонликка қарши курашиш, жамоатчиликнинг эътиборини кучайтириш ва профилактик чораларни янада самарали ташкил этиш мақсадида таъсис этилган.

Зўравонлик тушунчаси жисмоний тазйиқ қилиш билан чекланмайди. У ҳақорат ва таҳдид қилиш, руҳий босим ўтказиш, инсон орзу ва мақсадларини поймол этиш,  бефарқ муносабатда бўлиш каби кўплаб кўринишларга эга. Шу боис, бу масалага жамиятнинг ёндашуви ҳар қачонгидан ҳам масъулиятли бўлиши зарур.

Мазкур кундан бошлаб мамлакат бўйлаб “Зўравонликка қарши 16 кун” ижтимоий-маърифий тадбирлари старт олди. Фориш туманидаги “Инсон” ижтимоий марказида ўтказилган тадбир ҳам айнан шу мақсадга қаратилди.

Унда туман ҳокимининг ўринбосари, оила ва хотин-қизлар бўлими бошлиғи Раъно Дауланова иштирок этиб, зўравонликнинг олдини олишда аҳоли, айниқса хотин-қизларнинг фаол иштирокини таъминлаш муҳим эканини таъкидлади. Унинг таъкидлашича, 16 кунлик дастур доирасида оилаларда профилактика ишларини кучайтириш, аёлларни ҳуқуқий билимлар билан таъминлаш, уларнинг манфаатларини ҳимоя қилишга қаратилган йўналишлар асосий эътиборда бўлади.

Йиғилишда мазкур тадбирларни юқори савияда ташкил этиш, жойларда тарғибот ва тушунтириш ишларини фаоллаштириш, эҳтиёжманд хотин-қизлар билан ишлашнинг мақсадли механизмларини кучайтириш бўйича чора-тадбирлар белгилаб олинди.

“Зўравонликка қарши 16 кун” — бу  шунчаки тадбир эмас, балки жамиятдаги адолатсизликка нисбатан умумий муросасизликни шакллантириш, ҳар бир аёлнинг ҳимояланган ва қадрланганини ҳис қилиши учун амалий қадамдир.

<iframe width="560" height="315" src="https://www.youtube.com/embed/saoBhf0ISVE?si=-yUY3ju__kEn683f" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

А.Қаюмов (видео+сурат), ЎзА мухбири