Жиззах вилоятининг Зомин туманида Ўзбекистон Ёшлар иттифоқининг олий таълим муассасаларидаги ёшлар етакчилари учун уч кунлик форум ўтказилмоқда.

Республикамиздаги 200 дан ортиқ ОТМларнинг 180 нафар етакчилари давлат байроғини баланд кўтарган ҳолда сўлим “Зомин” болалар ёзги дам олиш оромгоҳига ҳарбий оркестр садолари остида тантанавор кириб келди.
Меҳмонлар миллий анъаналаримизга монанд нон-туз билан кутиб олинди.
Президентмиз раислигида жорий йилнинг 11 апрель куни ўтказилган ёшлар сиёсати соҳасидаги ишлар натижадорлигини ошириш чора-тадбирлари юзасидан видеоселектор йиғилишида мутасаддиларга юклатилган топшириқлари доирасида ва Олий таълим, фан ва инновациялар вазирлиги ҳамда Ўзбекистон Ёшлар иттифоқи Марказий кенгашининг жорий йил 29 мартдаги қўшма қарори ижросини таъминлаш мақсадида ёшлар етакчиларини жойларда олиб бораётган ишларини ривожлантиришларида муҳим аҳамият касб этмоқда.
Форум иштирокчилари уч кунлик форум дастури билан таништирилди. Қатнашчилар тўрт гуруҳга бўлинди. Ёшлар сиёсати ва спорт вазирининг ўринбосари, Ёшлар ишлари агентлиги директори А.Саъдуллаев “Ёшларга оид давлат сиёсатида янги ташаббуслар” мавзусида маъруза қилди. Жамоавий фаолият олиб бориш, олий таълим муассасаларида ёшлар кенгашини шакллантириш механизмлари хусусидаги Ўзбекистон Ёшлар иттифоқи Марказий кенгаши раисининг очиқ мулоқот тарзидаги чиқиши, ёшларда катта таассурот қолдирди.
“Ёшлар етакчиларининг вазифалари ва уларнинг иш фаолияти самарадорлигини ошириш чора-тадбирлари” мавзусидаги Жиззах давлат педагогика университети ёшлар етакчиси Ф.Одилованинг жонли ва асосли мисоллар билан қилган маърузаси форум қатнашчиларининг диққат марказида бўлди. 

[gallery-12105]
Ўзбекистон Ёшлар иттифоқининг олий таълим муассасаларидаги ёшлар етакчилари форуми давомида – Давлат бошқаруви академияси, мамлакатимиздаги қатор нуфузли университетлар академик, профессор ва ўқитувчилари, Ўзбекистон волонтёрлар ассоциацияси, Ёшлар ишлари агентлиги раҳбар ва етакчи мутахассисларининг маъруза, давра суҳбати ва сабоқларида иштирок этади.
Шунингдек, “Заковат” интеллектуал ўйинлари, турли қизиқарли спорт мусобақалари, маданий-маърифий тадбирларда иштирок этишлари ҳам форум дастуридан ўрин олган.
Ёшлар етакчилари форуми иштирокчилари Жиззах давлат педагогика университетида ёшлар етакчиси ҳамда олийгоҳ фаолияти билан танишиши ҳам режалаштирилган.

А.ҚАЮМОВ,
Ж.ЁРБЕКОВ (сурат), ЎзА