Президент ташрифидан сўнг...

Бугун Жиззах вилоятида амалга оширилаётган ишлар кўп жиҳатдан ҳудудга кенг жалб қилинаётган инвестициялар кўлами ҳамда тадбиркорларимизнинг эркин фаолият юритиши учун яратилаётган имкониятлар билан чамбарчас боғлиқ. Ҳудуднинг Зомин туманида барпо этилган кенг турдаги маиший техника воситалари ва бутловчи қисмлар ишлаб чиқарувчи мажмуа “Навоий” махсус саноат паркининг филиали сифатида ташкил этилди.

Мазкур саноат паркида 100 хил турдаги маҳсулот ишлаб чиқариш режалаштирилган. Жумладан, МДҲда энг катта пластмасса ишлаб чиқариш заводи ишга туширилиб, Озарбайжон, Қозоғистон, Қирғизистон ва Тожикистон давлатларига экспорт амалга оширилади. Бундан ташқари, автомобиллар учун пластмасса маҳсулотларини етказиб бериш йўлга қўйилади. 

Жорий йил 22 июль куни Президентимиз Жиззах вилоятига ташрифи доирасида мазкур саноат паркида бўлиб, мақсадли лойиҳалар билан танишди.

– Лойиҳамиз умумий майдони 180 минг метр квадрат. Бу ерда маиший техника ва бутловчи қисмлар ишлаб чиқариш мўлжалланган, ишга тушгач, 7 ярим минг иш ўрни яратилади. Унинг биринчи босқичи шу йилнинг август ойида фаолият юритиши режалаштирилган. Президентимиз мазкур лойиҳамиз билан танишиб, жумладан, лойиҳага ёшларни жалб этиш борасида муҳим топшириқларни берди, – дейди “Artel Engineering and Management” корхонаси раҳбари Шоҳрух Рўзиқулов.

Саноат паркида кир ювиш машиналари, совуткичлар, электр сув иситкичлар ва бошқа бутловчи қисмлар, қадоқлаш маҳсулотлари ишлаб чиқарилади. 

<iframe width="650" height="420" src="https://www.youtube.com/embed/0_nxI8wkY2w" title="Zominda yangi loyiha orqali 7 mingdan ziyod ish o‘rni yaratiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Абдулазиз РУСТАМОВ, Рустам НАЗАРМАТОВ (сурат), ЎзА