ЖССТ тиббий ниқобга нисбатан муносабатини ўзгартирди
Жаҳон соғлиқни сақлаш ташкилоти тиббий ниқобларга нисбатан ўз қарашларини ўзгартирди.
Жаҳон соғлиқни сақлаш ташкилоти тиббий ниқобларга нисбатан ўз қарашларини ўзгартирди. Тузилма эндиликда ҳукуматларга жамоат жойларида матодан тайёрланган ниқоб тақиш бўйича мажбурий тартиб жорий этишни маслаҳат бермоқда.
Пандемия бошланган пайтларда ЖССТ тиббий ниқобни фақат коронавирусга чалинганлар, касаллик белгилари пайдо бўлган инсонлар ёки улар билан алоқада бўлганлар тақишлари керак, деб ҳисоблаган. Ташкилот ниқоб вирусдан ҳимоя қилишига жиддий ишонч билан қарамаган ва асосан, қўлларни тез-тез ювиб туриш лозимлигини айтган.
Сўнгги тадқиқотлар эса бундай қарашларни ўзгартиришга мажбур қилмоқда. Яъни, агар тўғри фойдаланиладиган бўлса, ниқоб зарарланишдан самарали ҳимоя қилиши мумкинлигини кўрсатмоқда. Тузилма масъуллари кўплаб изланишлар натижаларига таянган ҳолда шуни таъкидлашяптики, коронавирусни айрим инсонлар ўзларида касалликнинг муайян белгилари пайдо бўлмасдан олдинроқ ҳам тарқата бошлаши мумкин экан.
Шу билан бирга, ЖССТ фақат ниқоб тақиш билангина вирусдан сақланиб бўлмаслигини, бунинг учун белгиланган барча чораларга риоя қилиш муҳимлигини ҳам алоҳида қайд этган.
«Ниқобнинг ўзи сизни "Covid-19"дан муҳофаза қила олмайди», - дейди ЖССТ раҳбари Тедрос Аданом Гебреесус.
Гарчи, ЖССТ ҳозирча тиббий ниқобларни ҳамма жойда, мунтазам тақиб юриш кераклигини қатъий уқтирмаётган бўлсада, матодан тайёрланган ниқоблардан кенгроқ фойдаланиш зарурлигига урғу бермоқда. Сабаби, айни масалада танқисликка дуч келинмайди, чунки одамлар бундай ҳимоя воситаларини ўзлари бемалол уй шароитида ҳам тикиб олишлари мумкин.
Қисқаси, ЖССТ қаердаки ижтимоий масофани сақлаш имконияти бўлмаса, ўша ерда, масалан, жамоат транспортида ёки дўконларда, албатта, тиббий ниқоб билан юришни тавсия қиляпти.