Дунё COVID-19 туфайли юзага келган вазиятдан сабоқ чиқариши керак ва янги пандемияларга тайёрланиши лозим, деди Женевада бўлиб ўтган брифингда Жаҳон соғлиқни сақлаш ташкилоти бош директори Тедрос Адханом Гебрейесус.

Унинг таъкидлашича, соғлиқни сақлаш ижтимоий, иқтисодий ва сиёсий барқарорликнинг асоси ҳисобланади. Шу боис касалликларни аниқлаш, олдини олиш ва уларга қарши курашиш учун маблағ сарфлаш зарур.

"Бу сўнгги пандемия эмас. Тарих бизга пандемия юзага келиши ҳаётимизнинг бир бўлаги эканини ўргатмоқда. Демак, навбатдаги пандемия келганда дунё бугунгидан яхшироқ тайёр бўлиши лозим", — қўшимча қилди Гебрейесус.

ЖССТ бош директорининг сўзларига қараганда, бугунги кунда атипик пневмония, яқин шарқ респиратор синдроми, қизамиқ, полиомиелит, Эбола, грипп ва бошқа касалликлар бошлангандан кейин тайёргарлик ишларини олиб борган мамлакатларда коронавирус бўйича ижобий ўзгаришлар кузатилмоқда.

Ташкилот тақдим этган маълумотларга кўра, коронавирус тарқалгандан кейин дунё бўйича ҳозиргача 26,7 миллион ҳолат аниқланган, қарийб 876 минг киши касаллик қурбонига айланган.