Жиззах вилояти бўйича Олий Мажлис Қонунчилик палатаси депутатлиги учун 6 та сайлов округи тузилган эди. 22 декабрда бўлиб ўтган сайловларда улардан фақат битта сайлов округида номзод етарли овоз олиб, депутатликка сайланди. 

Бугун вилоят ҳудудидаги Олий Мажлис Қонунчилик палатасига сайлов ўтказувчи 5 та – 32-Жиззах, 33-Дўстлик, 35-Ғаллаорол, 36-Пахтакор, 37-Шароф Рашидов сайлов округларида такрорий сайловлар ўтказилмоқда. 

35-Ғаллаорол сайлов округи ҳудуди 81 та сайлов участкаси тузилган. Бу участкалардан 61 таси Бахмал, 20 таси Ғаллаорол туманлари ҳудудида жойлашган. 

Ушбу округга қарашли Ғаллаорол тиббиёт коллежида жойлашган 430-сайлов участкасида такрорий овоз бериш сайлов қонунчилиги талаблари асосида соат 8.00 дан бошланди. 

–Участкамизда Ғафур Ғулом маҳалласида яшовчи 991 нафар сайловчи рўйхатга олинган, — дейди участка сайлов комиссияси раиси Акбар Ўсаров. — Сайлов жараёнларида фуқароларимизнинг фаол иштирокини таъминлаш мақсадида белгиланган тартибда ҳар бир сайловчини хабардор қилдик. Сайлов бошланган сўнг ўтган бир соат давомида 265 нафар сайловчи овоз берди. Такрорий овоз бериш жараёнида сайловчилар фаол қатнашиб, ўз фуқаролик ҳуқуқини намоён этмоқда. 

Шунингдек, бугун вилоят кенгашига сайлов ўтказувчи 23 та, шаҳар ва туман кенгашларига 80 сайлов округларида такрорий овоз бериш ўтказилмоқда.