– Респубика ҳукумати томонидан тасдиқланган Жиззах шаҳрининг бош режасига асосан жуда катта ҳажмдаги қурилиш ва бунёдкорлик ишлари амалга оширилаётир, - дейди вилоят қурилиш бош бошқармаси бошлиғи Эргаш Қўлдошев. — Шу пайтгача шаҳардаги энг баланд бино ўн қаватли эди. Энди вилоят маркази фақат энига эмас, бўйига ҳам кенгаяди. 16 қаватли турар жой бинолари бунёд этилиши бу катта ишнинг бошланиши. 

Бунёд этилаётган 16 қаватли уйларни лойиҳалаштиришда қурилиш ва меъморчилик қонун-қоидаларининг барча жиҳатлари ҳисобга олинган. Ҳар бири 80 хонадонга мўлжалланган бу уйлар замонавий меъморчиликнинг сўнгги ютуқлари асосида бунёд этилмоқда. Аниқроғи янги турар жой бинолари замонавий Туркия технологияси асосида, энергия тежамкор ашёлардан қурилаётир. Бундай ашёлардан бунёд этилган бинолар жаҳон андозаларига тўла жавоб беради.

Мутахассисларнинг фикрича, Туркия технологиясининг энг муҳим жиҳатларидан бири қурилаётган бинонинг бир қаватини бунёд этиш учун атиги 3 кун керак бўлар экан. Иншоот девор оралиқларидаги каркаслар тайёр бўлгач, механизмлар ёрдамида тўсинлар оралиғини бетон қоришмаси билан тўлдириш учун атиги 56 дақиқа талаб этилади. Шундай қилиб, бинонинг биринчи қавати деворлари бор-йўғи 72 соатда тикланади.

Турар жой биноларининг ҳар жиҳатдан қулай, шинам ва замонавийлиги кўпчилик эътиборини тортади. Ҳозирда нафақат шаҳарликлар, балки қўшни туманларда истиқомат қилувчилар ҳам ана шу уйларни сотиб олиш истагини билдирмоқда. 

Қурилиш ишларини “Бобур-Темур қурилиш материаллари" ва "Zinatkor" масъулияти чекланган жамиятлари қурувчилари амалга оширмоқда. 

—Жиззахда илк бор бунёд этилаётган 16 қаватли турар жой биносини қуришдек масъулиятли вазифа зиммамизга юклатилди, — дейди бош пудратчи "Бобур-Темур қурилиш материаллари" масъулияти чекланган жамияти раҳбари Маҳмуд Турсунов. — Президентимизнинг касб байрамимиз муносабати билан йўллаган табригида қурувчиларга билдирган юксак ишончи руҳимизни жуда кўтарди. Энг замонавий технология асосида бунёд этилаётган монолит уйларни қуришда барча ишлар ҳар бир қаватини кўтариш кунлик аниқ режа-жадвал асосида олиб борилаётир. 

Бу йил Жиззах шаҳрида амалга оширилаётган қурилиш ва бунёдкорлик ишлари кўлами янада кенгаяди. Шаҳарнинг "Ўзбекистон" кўчаси кенгайтирилади. Ҳозир бу ерда 7 та 9 қаватли замонавий турар жой бинолари, Ўрта Осиёда ягона бўлган "Велотрек" мажмуаси ва бир қатор маданий-маиший хизмат кўрсатиш иншоотлари барпо этилаётир. 

Пандемия туфайли юзага келган қийинчиликларга қарамай вилоятда қурилиш, бунёдкорлик давом этаётир. Ҳудуддаги шаҳар ва қишлоқларнинг меъморий қиёфаси тубдан янгиланмоқда. Бу янгиланиш, яратувчилик одамларнинг юртимиз келажагига, эртанги кунга бўлган ишончини мустаҳкамламоқда.