27 майдан бошлаб эса, ушбу тартиб самолётларда ҳам жорий қилинади. Транспорт компаниялари ходимлари ниқоб тақиб юрмаган йўловчиларни транспортга чиқармаслиги мумкин. Бунинг учун улар ёки транспорт компанияси жавобгарликка тортилмайди.

“Ҳозирги қонунчиликда, транспортда ниқоб тақмаган йўловчига ҳеч қандай жазо чораси кўзда тутилмаган. Шу боис транспорт ходимлари ниқоб тақмаган йўловчиларга нисбатан ҳеч қандай жазо чорасини кўра олмайди, фақат уни транспортга чиқармаслиги мумкин, халос“, — деди Марказий штабдагилар.

Бундан аввал ушбу тартибга Сеул, Инчхон, Тэгу шаҳарларида амал қилинарди, энди у мамлакатнинг барча минтақасига жорий қилинадиган бўлди. Одамлар тўпланадиган жойларда, транспортларда ниқоб тақиб юриш қоидалари кўрсатилган плакатлар барча жойга илиб ташланган. Шу боис Жанубий кореяликлар одатда шундоғам транспортларга ниқобсиз чиқмасди. Бироқ ёз келиши билан фуқаролар иссиқдан шикоят қилиб, ниқобларни тақмасликка ёки шунчаки хўжа кўрсинга тақиб юришга ҳаракат қилмоқда.

Айрим кишилар биров билан суҳбатлашаётганда ёки телефонда гаплашаётганда ниқобни ечиб қўймоқда. Транспорт воситаларида ҳайдовчилар овоз кучайтиргичлар орқали йўловчиларга ниқоб тақиб юришни мунтазам равишда эслатиб турибди, аммо йўловчилар ушбу чақириқларга ҳар доим ҳам амал қилаётгани йўқ ёки шунчаки рад этмоқда.

Касалликнинг олдини олиш ва уни назорат қилиш марказлари раҳбари Чон Ин Гённинг таъкидлашича, Жанубий Кореянинг ички йўналишларида қатнаётган самолётларда ҳали коронавирусга чалиниш ҳолати қайд қилинмаган. Шундай бўлсада, 27 майдан бошлаб самолёт бортларида ҳам йўловчиларнинг ниқоб тақиб юриши қаттиқ назорат қилинади.

Жанубий Кореяда мана икки ҳафтадирки, коронавирусга чалиниш билан боғлиқ ҳар куни тахминан 20 та ҳолат қайд қилинмоқда. Ҳозиргача инфекция юқтирганлар сони 11 минг 225 кишига етди. Жумладан, коронавирусга чалинганларнинг тўққиз нафари автобусларда қайд қилинган бўлса, 12 киши таксида инфекция юқтиргани аниқланган.