Агентликнинг ёзишича, Чон фамилияли киши оёғидан туфлисини ечиб президент томонга улоқтирган, лекин кўзлаган нишонига теккиза олмаган. Уни полиция ҳибсга олган.

«Мен президент Мун Чжэ Инга пойабзалимни улоқтирдим. Мен унинг нафрат ва шармандаликни ҳис қилишини истадим», — деди у.

Унинг президентга нисбатан салбий муносабатига нима сабаб экани айтилмаяпти.

Таъкидлаш жоизки, таниқли сиёсатчиларга қарата пойабзал улоқтириш ўз фикрини намоён қилишнинг ўзига хос усулига айланиб улгурган. Ушбу анъанани илк бор ироқлик журналист Мунтазир аз-Зейди бошлаб берган эди. У 2008 йилда АҚШ президенти Жорж Бушга қарата пойабзалини отганди. Бу «қаҳрамонлик» учун у уч йил қамоқда ўтириб чиқди.

Шундан кейин пойабзал отиш нишонига Судан президенти Омар ал-Башир, хитойлик бош вазир Вен Сзябао, Режеп Тайип Эрдўғон бош вазир бўлган чоғлари ва Халқаро валюта фондининг собиқ раҳбари Доминик Стросс-Канн ҳам дуч келган. Эроннинг собиқ президенти Маҳмуд Ахмадинежад эса пойабзал парвози қандай бўлишини ўз бошида бир неча бор синаб кўрган.

Таниқли сиёсатчиларга нафақат пойабзал улоқтирилади, балки қўлга тушган ҳар қандай нарса билан ҳам ҳужум қилиб қолишлар мумкин. Масалан, бир киши Киевда бўлиб ўтаётган оммавий митингда Украинанинг собиқ президенти Пётр Порошенкога бир боғлам қалбаки купюрани отган эди. Уни одамлар тўдасидан куч билан олиб чиқишди, деб ёзганди ўшанда РИА Новости мухбири.

Исроил бош вазири Биньямин Нетаньяху олма зарбасини татиб кўрган. Бош вазирга олма улоқтирган ўқитувчи аёл Исроил бош прокурори Авихай Манделблитнинг қарори билан уч ойга ишдан четлатилган, деб хабар берган Исроил телевидениесининг 13 чи канали.