Йигитлар уни кутиб олишди ва тезлик билан саф тортиб машғулотларни бошлаб юборишди. Биз эса ҳайрон бўлдик. Қаҳрамонимиз жуда кўп қиррали инсон экан-да, бир парашютдан сакрайди, бу орада мерган-у, алоқачиларга сабоқ ҳам беради. Энди жанг санъатини бажаришда ҳам ҳамкасбларига намуна бўлмоқда.

Бизга ҳамроҳлик қилаётган ҳарбий қисм психологи бу хаёлларимизни ўқиб тургандек, бир хизматчи қилган ишни бошқалар ҳам қилиши, яъни битта вазифани шахсий таркибдаги ҳар бир инсон лавозимидан қатъи назар, аъло даражада бажар олиши кераклигини таъкидлади.

Жангдаги кичик ҳийлалар, жанг санъати техникаси акс этган ҳарбий машғулотни кузатаётиб, кўнглингиз фахрга тўлади. 

Қайд этиш керакки, йил давомида қўшинларнинг ўқув-моддий базасини, ҳарбий шаҳарча ва полигонларнинг инфратузилмасини такомиллаштириш, бўлинмаларни янги қурол-аслаҳа, ҳарбий техника ва бошқа зарур анжомлар билан таъминлаш ишлари олиб борилди.

Бунда қўшин турларининг ҳамкорлигини ташкил этиш, қўлланилиш тактикаси ва стратегиясининг замонавий тажрибаси чуқур ўрганилди. 

Бу жараён ҳаётда жанговар шароитларга максимал даражада яқинлаштирилган ҳолда ташкил этилаётган гуруҳ, взвод ва батальон тактик ўқувларида қурол-яроғ ва ҳарбий техниканинг энг янги намуналарини қўллаш, шахсий таркибнинг яшовчанлигини ошириш, мураккаб ҳудудларда топшириқларни минимал йўқотишлар билан бажариш каби машқларда ўз аксини топди.