Маросимда Ўзбекистон Республикаси Бош вазирининг биринчи ўринбосари А.Раматов сўзга чиқиб, Президентимиз Шавкат Мирзиёев раҳбарлигида ҳар томонлама баркамол авлодни вояга етказишнинг муҳим воситаси сифатида жисмоний тарбия ва спортни ривожлантиришга алоҳида эътибор қаратилаётгани, бунинг самарасида Ўзбекистонда кўплаб спорт турлари каби бокс ҳам ёшлар ўртасида жадал ривожланаётганини таъкидлади. Шунингдек, бугунги кунда ўзбек бокс мактаби тарбияланувчилари спорт оламининг барча нуфузли мусобақалари – Олимпия ва Осиё ўйинлари, жаҳон ва қитъа чемпионатларида юқори натижаларга эришаётгани ҳақида тўхталиб ўтди.

Дарҳақиқат, бугун ўзбек бокс мактаби тарбияланувчиларининг эришаётган ютуқларини дунё эътироф этмоқда. Жумладан, Россияда ўтказилган жаҳон чемпионатида 80 га яқин мамлакатдан келган 362 боксчи ўртасида ўзбек ўғлонлари ҳеч кимдан кам эмас ва кам бўлмаслигини исботлади.

Жаҳон чемпионатида 91 килограммдан ортиқ вазн тоифасида иштирок этган ҳамюртимиз Баҳодир Жалолов дастлабки жангда украиналик Цотне Рогани, чорак финалда америкалик Ричард Торресни биринчи раундда нокаутга учратди. Кескин ва муросасиз ўтган ярим финал баҳсида боксчимиз россиялик Максим Бабанинни енгди. Финал жангида Баҳодир азалий рақиби қозоғистонлик Камшибек Конкабаевга ҳеч қандай имконият қолдирмади ва жаҳон чемпионлигини қўлга киритди.

Ўзининг ёрқин ғалабалари, рақибларига бўлган ўзбекона ҳурмати билан ҳурмат қозонган жамоа сардори Баҳодир Жалолов мусобақа ташкилотчилари томонидан чемпионатнинг “Энг яхши боксчиси“ деб топилди.

Шунингдек, дунё биринчилигида мамлакатимиз шарафини ҳимоя қилган Шаҳобиддин Зоиров (-52 кг), Миразизбек Мирзахалилов (-57 кг) ҳам барча рақибларини енгиб, олтин медални қўлга киритди. Финалга қадар муваффақиятга эришган Дилшодбек Рўзметов (-81 кг) кумуш медалга, истеъдодли вакилимиз Бобо-Усмон Ботиров (-69 кг) бронза медалга сазовор бўлди.

Тақдирлаш маросимида бу спортчилар ва уларнинг мураббийларига Президент совғаси – пул мукофоти ва автомобиллар топширилди.

Жумладан, чемпионатнинг олтин медалини қўлга киритган ҳар бир боксчи 12 минг АҚШ доллари ва “Tracker” автомобили, кумуш медаль соҳиби 6 минг АҚШ доллари ҳамда “Gentra” автомобили, бронза медаль совриндори 3 минг АҚШ доллари ва “Nexia 3“ автомобили билан тақдирланди.

Шунингдек, олтин медаль совриндорлари мураббийлари 6 минг АҚШ доллари, кумуш медални қўлга киритган боксчимиз мураббийи 3 минг АҚШ доллари, бронза медалга сазовор бўлган спортчимиз мураббийи 1500 АҚШ доллари билан мукофотланди.

– Президентимизнинг биз, спортчиларга билдираётган катта ишончи, мураббийларнинг маслаҳати ва қўллаб-қувватлаши жаҳон чемпионатидаги муваффақиятимизда асосий омил бўлди, – деди Б.Жалолов. – Давлатимиз раҳбарининг камтарона меҳнатларимизни юқори баҳолангани бизга янада куч-ғайрат бағишлайди. Шунингдек, давлат мукофоти билан тақдирланганимиз учун чин дилдан миннатдорлик билдирамиз. Олимпия ўйинларида ҳам мамлакатимизга олтин медални келтиришни ўз олдимизга мақсад қилганмиз.