Коронавирусга қарши ZF-UZ-VAC2001 вакцинасининг 3-фаза клиник синовлари натижалари хитойлик ҳамкорлар томонидан жорий йилнинг 27-28 август кунлари Хитой фонд бозори ҳамда Рейтер ахборот агентлиги сайтида эълон қилинди.

Ўзбекистон Республикаси Инновацион вазирлиги матбуот хизмати маълумотига кўра, 3-дозадан сўнг вакцинанинг самарадорлиги барча штаммлар учун умумий 81,76 фоиз, «британча» штаммга қарши эса 92,93 фоизни ташкил этди. Ўлим ва оғир ҳолатларга қарши 100 фоиз самарадорлик кўрсатди. ЖССТ талабларига кўра, вакцина камида 50 фоиздан юқори самара бериши лозим.

Маълумот ўрнида таъкидлаш лозимки, ZF-UZ-VAC2001 клиник тадқиқотларида иштирок этувчи жами 28 минг 500 нафар кўнгилли рўйхатдан ўтказилган бўлиб, улардан 14 минг 249 нафари вакцина ва 14 минг 251 нафари плацебо олганлиги қайд этилган.

Хитойлик ҳамкорлар томонидан вакцина ва плацебо гуруҳлари бўйича маълумотлар очилди. Мазкур кўнгиллилардан 647 нафарида касаллик аниқланган, улардан 221 нафарида касаллик 3 та доза вакцина олгандан сўнг 7 кундан кейин аниқланган. Шундан 35 нафари вакцина билан, 186 нафари плацебо билан эмлангани аниқланди. Бу вакцинанинг коронавируснинг барча штаммларига қарши умумий 81,76 фоиз самарали эканини кўрсатади.

Шуни алоҳида қайд қилиш керакки, Жаҳон соғлиқни сақлаш ташкилоти протоколига кўра, 3-фаза синовларини очиқлаш ҳамда статистик таҳлиллар ўтказиш учун тўлиқ вакцинадан сўнг камида 156 ҳолда касаллик аниқланиши керак. ZF-UZ-VAC2001 вакцинасининг 3-фаза клиник синовлари натижаси 221 нафар касаллик аниқланган иштирокчилардаги таҳлилга кўра аниқланди ва бу синов натижасини янада аниқроқ бўлишини таъминлайди.

Бошқа вакциналарда олиб борилган тадқиқотларга таққосланса, Pfizer вакцинасининг самарадорлиги 85 фоиз, AstraZeneca 68 фоиз экани, Moderna вакцинаси эса «бирламчи» штамм (Уханча) учун юқори самарадорликни кўрсатиб (94 фоиз), «дельта» штамм учун 76 фоизгача пастлагани илмий адабиётларда қайд этилган.

Муҳайё  Тошқораева, ЎзА