Хитой-Ўзбекистон ҳаммуаллифлигида ZF-UZ-VAC2001 вакцинаси яратилганидан хабарингиз бор.

Мазкур вакцинадан яна бир миллион доза Ўзбекистонга олиб келинди. Вакцинанинг биринчи партияси жорий йилнинг 27 март куни, иккинчи партияси эса 27 апрель куни олиб келинган эди.

Айтиб ўтиш керакки, ZF-UZ-VAC2001 вакцинасини яратишда коронавирус ташқи оқсили биотехнологик усул билан синтезланиб олинган. У организмга юборилганда оқсилга нисбатан иммун жавоб ҳосил бўлади. Бундай вакциналар бошқа турдаги вакциналар билан солиштирганда энг юқори хавфсизлик профилига эга.

Инновацион ривожланиш вазирлиги ҳузуридаги Илғор технологиялар маркази ва Соғлиқни сақлаш вазирлиги ҳузуридаги Вирусология илмий-тадқиқот институти олимлари Хитойнинг ZF2001 вакцинаси устидаги тадқиқотларни кенг кўламда ўтказилишига ўз ҳиссасини қўшди.

Амалга оширилган ишлар натижасида хитойлик ҳамкорларимиз Ўзбекистонни мазкур вакцина ҳаммуаллифи, деб эълон қилди ва вакцинага ZF-UZ-VAC2001, деб ном берилди. ZF-UZ-VAC 2001 коронавируснинг янги типига қарши рекомбинант (CHO cell) вакцина тиббиёт амалиётида қўллаш учун тегишли тартибда давлат рўйхатидан ўтказилди. Рўйхат рақами – DV/X 08646/03/21.

Таъкидлаш жоизки, ҳозирга қадар мазкур вакцина билан Хитойда 30 миллион киши эмланган.