Әзербайжанда «Россия сегодня» медиатобына кіретін Sputnik ақпарат агенттігінің өкілдігі жабылды.

Бұл туралы Әзербайжан Сыртқы істер министрлігінің баспасөз хатшысы Ойхан Хожизаде хабарлады.

Хожизаденің айтуынша, Ресейлік компания Әзербайжанда тек бір ғана журналистке аккредитация ала алады. Дегенмен, «Россия сегодня» медиатобы өкілдіктің жабылғаны туралы ресми хабарлама алмағанын мәлімдеді.

Сонымен қатар, Әзербайжанда BBC қызметі де тоқтатылды. Корпорация жариялаған мәлімдемеге сәйкес, Әзербайжан билігі бұл шешім туралы тек ауызша хабарлаған. Журналистер «жағдай айқындалғанға дейін» жұмысын уақытша тоқтатты.

BBC әзербайжан тіліндегі репортаждарын жалғастыруға ниетті екенін білдірді. Ал Әзербайжан Сыртқы істер министрлігі тек бір ғана тілшіге аккредитация беруді жоспарлап отырғанын атап өтті.

Бұдан бөлек, Әзербайжан билігі «Америка дауысы» радиосының журналистінің аккредитациясын қайтарып алды. Бұл шешімнің нақты себептері жарияланған жоқ.

Ақпан айының басында Әзербайжан билігі Бакудегі Орыс үйінің қызметін тоқтатқанын хабарлаған болатын. Бұл шешім сондай-ақ АҚШ-тың Халықаралық даму агенттігіне (USAID) қатысты да қабылданды. BakuTV телеарнасы Бакудегі Орыс үйінің Ресейдің арнайы қызметтерімен байланысы бар екенін мәлімдеді. Осыдан кейін Әзербайжан елшісі Рахман Мустафаев Ресей Сыртқы істер министрлігіне шақырылып, оған ресми наразылық білдірілді.