Украина Президенти Владимир Зеленский Венгрия Бош вазири Виктор Орбанни Россия Президенти Владимир Путинни “қўллаб-қувватлаётгани” учун кескин танқид қилди. Сабаби, Будапешт Киевнинг Европа Иттифоқига кириш йўлидаги саъй-ҳаракатига тўсиб қўймоқда.

Зеленский “Euronews” бош директори билан видео алоқа орқали уюштирилган интервьюда шундай деди:

 – Мен Орбанга ниманидир айтишим шарт эмас. Аксинча, у Украинага ёрдам таклиф қилиши керак. Зеро, Украина бутун Европани Россиядан ҳимоя қилмоқда. Биз уруш давом этаётган даврда ҳам Венгриядан ҳеч қандай ёрдам олганимиз йўқ. Виктор Россияни қўллаб-қувватлашига қаршимиз, чунки Украина ЕИга қўшилишига қарши чиқиш Путинни аниқ қўллаб-қувватлаш демакдир.

Украинанинг ЕИга кириш ёки кирмаслиги Европа давлатлари ўртасида баҳсли масалага айланган. Бу ўринда Виктор Орбанни ҳам айблаб бўлмайди, чунки у ўз фуқаролари истагини ҳам инобатга оляпти. Айни масала бўйича ўтказилган миллий сўровнома қатнашчиларининг 95 фоизи Украина ЕИга қабул қилинишига қарши чиқди ва Орбан энди шу хулосани ўз ветосини оқлаш учун ишлатмоқда.

Бош вазир бу масалада шундай деган:

– Европадаги ҳамкасбларимиз томонидан кучли босим кузатиляпти. Биз эса бу урушга аралашмаслик учун бор кучимизни ишга солишимиз керак.

Будапешт ҳозирча ўз қарашини ҳимоя қилиб турибди. Мутахассислар фикрича, мазкур ёндашув 2026 йил апрелда бўлиб ўтадиган Венгрия сайловигача сақланади. Мабодо, Орбан мухолифат етакчиси Петер Мадьярга ўрнини бўшатиб берса, Будапешт позицияси ўзгариши мумкин.

Украина Президенти дипломатия шахсиятдан юқори туриши кераклигини таъкидлаб, етакчилар бир-бирини ҳурмат қилиши лозимлигини қўшимча қилди. Сўнг Орбанни Европа комиссияси баҳосига қулоқ тутишга чақирди:

– Биз тирик қолиш учун курашяпмиз ва қўшниларимизда ҳам уруш очилишини истамаймиз. Венгрия Бош вазири бизга ёрдам берсин, ҳеч бўлмаганда ЕИ киришимизга қаршилик қилмасин.

Янги аъзо тан олиниши учун ЕИнинг барча 27 давлати, жумладан Венгрия ҳам розилик бериши лозим. Виктор Орбан эса буни хоҳламаяпти.

<iframe width="640" height="420" src="https://www.youtube.com/embed/HHc9XP0x0zI" title="Zelenskiy: Ukraina Yevropani Rossiyadan himoya qilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА