Украина президенти Владимир Зеленский Россия билан низони тугатишга қаратилган 20 банддан иборат тинчлик режасини эълон қилди, деб хабар бермоқда “DW” нашри.

Ҳужжатда мамлакат суверенитетини тасдиқлаш, РФ ва Украина ўртасида ҳужум қилмаслик келишувини имзолаш, узоқ муддатли хавфсизлик кафолатларини жорий этиш келтирилган. Қуролли кучлар сони тинч даврда 800 минг нафар этиб белгиланиши таклиф қилинмоқда.

Шунингдек, дастурда Украинага АҚШ, НАТО ва Европа давлатлари томонидан хавфсизлик кафолатлари берилиши, ўлканинг аниқ муддатларда Европа Иттифоқига аъзо бўлиши, иқтисодий тикланиш учун йирик молиявий фондлар ташкил этилиши кўзда тутилган. Шу билан бирга, Украина ўзининг ядросиз давлат мақомини тасдиқлаши қайд этилган.

Бундан ташқари, режада асирлар алмашинуви, денгиз йўлларидан эркин фойдаланиш, сайловлар ўтказиш ва тўлиқ ўт очишни тўхтатиш масалалари ҳам ўрин олган. 

Д.Ҳакимов, ЎзА