Украина Президенти Владимир Зеленскийнинг сўзларига кўра, узоқ масофага мўлжалланган ракеталардан Россия ҳудудига йўналтирилган зарбалар туфайли Москванинг нефтни қайта ишлаш қуввати 20 фоиз қисқарган. Ушбу маълумот Ғарб разведка манбаларига асосланган.

Таъкидланишича, РФ ичкарисига берилган чуқур зарбаларнинг 90 фоиздан кўпи маҳаллий қурол ёрдамида амалга оширилган.

– Бу йўналишда ҳар куни ишлашимиз керак, — деди Зеленский янги молиявий ёрдам Украина учун зарурлигини қўшимча қиларкан.

РФ нефть ва газ экспорти урушни молиялаштиришнинг асосий манбаси бўлиб қолмоқда. Шу боис АҚШ ва Европа Иттифоқи Москванинг энергия даромадини чеклашга қаратилган янги санкция жорий этмоқда.

Америка Президенти ўтган ҳафта Роснефть ва Лукойл компанияларига қарши 21 ноябрдан кучга кирадиган

санкция эълон қилди. Зеленский бу чорани “Россияга босим ўтказиш воситаси” сифатида баҳолади.

Рус нефтининг энг йирик харидорлари — Ҳиндистон ва Хитой. Зеленский фикрича, Деҳли энергия импортини камайтиришга тайёрлигини билдирган. Трамп ва Хитой раҳбари Си Цзиньпин ўртасида шу ҳафта Жанубий Кореяда бўлиб ўтадиган учрашувда ҳам Москва нефтини харид қилиш ҳажмини қисқартириш масаласи муҳокама қилиниши кутиляпти.

АҚШ санкциясидан сўнг Лукойл халқаро активини сотиш бўйича музокара бошланганини эълон қилди. Компаниянинг 11 мамлакатда лойиҳалари, жумладан Болгария, Руминия ва Нидерландиядаги нефть заводларида улуши бор.

Урушнинг тўртинчи йили яқинлашяпти. Томонлар муросага тайёр эмас, Ғарб босими кучаймоқда — санкция Россия иқтисодий имкониятини тобора камайтирмоқда.

Мусулмон Зиё, ЎзА