– Уруш бошлангандан бери биринчи марта Россияда нефть қазиб олиш ва қайта ишлаш ҳажми сезиларли даражада пасайиши қайд этилди, – деди Украина Президенти Владимир Зеленский ташқи разведка хизмати директори Олег Ивашченконинг ҳисоботидан сўнг. – Россия нефть ва газдан оладиган даромад камаймоқда. Йил охирига келиб бу йўқотиш тахминан 37 миллиард долларни ташкил қилади. Бундан ташқари рус нефть компаниялари ва бутун энергетика сектори ҳам ўнлаб миллиард доллар зарар кўяпти. Буларнинг бари РФ ҳарбий машинасини ортга тортмоқда. Анъанавий санкция ва Украинанинг узоқ муддатли чеклови ҳам самарали ишлаяпти. Босимнинг кейинги босқичи ҳам ўйлаб қўйилган.

Тарқатилган сўнгги хабарларга кўра, Украина Россия нефть портига ҳужум қилгач, “қора олтин” нархи яна кўтарилган.

“Bloomberg” ёзишича, Украина кечаси Новороссийскдаги муҳим портга ҳужум қилган ва Эрон Ҳормуз бўғози яқинида танкерни қўлга олгандан сўнг хом ашё қиймати 3 фоиз ошган.

Дронлар билан уюштирилган йирик ҳужум "Шесхарис" нефть терминали ва Қора денгиздаги стратегик жиҳатдан муҳим ҳисобланган бандаргоҳда турган кемага зарар етказди. Новороссийск порти кўп миқдорда Қозоғистон нефтини ҳам ўтказади. Сентябрь-октябрь ойларида бу манзилдан кунига тахминан 700 000 баррель РФ нефти жўнатилган. Шу яқин атрофдаги яна бир терминал кунига 1,5 миллион баррелдан зиёд Қозоғистон нефтини ташийди.

Бу воқеа Пентагон вакили Эрон дунё нефтининг қарийб бешдан бир қисми ўтадиган Ҳормуз бўғозида хом ашё ортилган танкерни қўлга олгани ҳақида баёнот берган вақтга тўғри келди. Расмийлар ҳалигача кеманинг Эрон сувли ҳудудига ўтиши ҳолатини аниқлашда давом этаётган бир пайт, "ҳодиса Теҳрон яна бир бор тижорат кемаларини ушлаш амалиётига мурожаат қилаётганидан хавотирни кучайтиради, дейилган хабарда.

С.Раҳимов, ЎзА.