Украина Олий радаси раисининг биринчи ўринбосари Александр Корниенко сешанба куни Владимир Зеленский янги қонунни имзолагани ҳақида маълум қилди.

 Ушбу қонун бўйича энди "босқинчи давлат билан” ҳамкорлик қилган шахслар қамоқ жазосини олиши мумкин.

Украина ҳукумати 2015 йил январда Россия Федерациясини расман "босқинчи мамлакат", деб эълон қилган эди. Олий рада 3 март куни мамлакат жиноят кодексига тузатиш киритадиган қонун қабул қилди. Биринчи ҳужжатга кўра, “босқинчи давлат” билан ҳамкорлик қилган шахс 15 йилгача қамоқ жазосига ҳукм қилиниши мумкин, иккинчи ҳужжат биринчи қонун бўйича айбловга алоқадор сиёсий партиялар ва юридик шахсларни ёпиш имконини беради.

"Украина президенти томонидан коллаборационизм тўғрисидаги қонун имзоланди ва яқин орада ушбу ҳужжат эълон қилинади", – деди Корниенко "Украина 24" телеканали эфирида чиқиш қилиб. Унинг қўшимча қилишича, Украина парламентининг тахминан 20 та депутати ҳарбий амалиётлар бошланиши билан мамлакатни тарк этган.

Унинг фикрича, энди улар Россия билан ҳамкорлик қилганликда айбланиб, янги қонунда назарда тутилган энг юқори муддатга жазоланиши керак.