Президент Владимир Зеленский Брюсселдаги саммитда Россияга ҳеч қандай ҳудудий имтиёз берилмаслигини айтди. “Euronews” ёзишича, Украина етакчисининг бу баёноти Москва урушни тўхтатишни рад этиб, ЕИ ва АҚШ РФга нисбатан янги санкция киритгандан сўнг янграган.

Кремль талабини ўзгартирмаяпти: Қрим, Донецк, Луганск, Запорожье ва Херсон устидан назоратни сақлаб қолиш ниятида.
АҚШ матбуоти Путин Трампга янги таклиф берганига эътибор қаратган. Яъни, Украина ўз назоратидаги Донбасснинг бир қисмини топшириши, эвазига Херсон ва Запорожье вилоятларининг кичик ҳудудий қисмини олиши керак.
Гап мамлакат шарқидаги Донецк вилояти ҳақида кетяпти. Луганск билан бирга Донбасс деб аталадиган, йирик саноат минтақаси ҳисобланган бу ҳудудни руслар 2014 йилдан бери тўлиқ назоратга олишга уриниб келяпти.

Зеленский фикрича, урушни жорий фронт чизиғи бўйлаб музлатиш айни дам энг мақбул, мувозанатли ечим бўлиши мумкин. Айни қарорни у ҳарбий ҳаракат тўхтатилиши йўлидаги биринчи қадам сифатида кўраётганини билдирган.

– Афсуски, Путин бу таклифни қўллаб-қувватлашига ишончим йўқ, – деган  Зеленский.

Маълумотларга қараганда, Киев Украина ҳудудида дарҳол ва ҳеч қандай шартсиз оташни тўхтатиш учун энг тўғри йўл деб ҳосбланаётган айни ёндашувни Трамп билан кечган илк музокараданоқ илгари суриб келади. Кейинги босқичда эса Зеленский ва Путиннинг тўғридан-тўғри суҳбати назарда тутилган.

Кремль мазкур режага кўнмади. Шундан сўнг Москвага босимни кучайтириш ва русларни ҳужумни тўхтатишга мажбурлаш мақсадида АҚШ “Роснефть” ва “Лукойл” га санкция жорий этди. Бу ҳақда Қўшма Штатлар молия вазири Скотт Бессент шундай деди:

– Путин бемаъни урушни тўхтатишдан бош тортгани учун Кремлнинг ҳарбий машинасини молиялаштираётган икки йирик рус нефть компаниясига санкция қўллаймиз.

Путин журналистлар билан учрашувда қайд этишича, “бу чекловнинг жиддий таъсири сезилмайди”.

<iframe width="650" height="420" src="https://www.youtube.com/embed/koQTsDku98Y" title="Zelenskiy Putinning shartiga ko`nmoqchi emas" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА