Украина етакчиси Владимир Зеленский мамлакатда президент сайловини ўтказиш санаси 24 февралга белгилангани эълон қилингани ҳақидаги хабарларни инкор этди ва бу борадаги ўз қарашини билдирди. У таъкидлаганидек, “Хавфсизлик биринчи ўринда туради. Бинобарин, тўлиқ кўламли уруш бошлангани тўрт йиллиги муносабати билан сайлов масаласини муҳокама қилиш ғоясининг ўзи қабул қилиниши мумкин эмас”.

Зеленский айтишича, “24 февраль рамзий ва фожиали сана: тўрт йиллик уруш, минглаб ўлим, давлат учун кундалик кураш. Ҳеч қандай сайлов ушбу кунда эълон қилиниши мумкин эмас”.

Умуман, сайлов ҳақида гапирар экан, Зеленский яна бир бор такрорлади: аввал сулҳ ва хавфсизлик кафолати – кейин сиёсий жараён. Унинг сўзларига кўра, Украина сайловга тайёр, аммо муаммо тинчликка эришиш йўлида ташланган ҳақиқий қадамлардан сўнг ҳал қилиниши керак. Президент ҳозирча энергетика сулҳи таклифига жавобан дрон ва ракета ҳужуми кузатилгани, бу Москва музокара истамаслигини кўрсатишини қайд этди. Шунингдек, у эҳтимолий музокара ҳақида ҳам фикр билдирди:

– Қўшма Штатлар келаси ҳафта Майамида учрашув ўтказишни таклиф қилди ва бунга Украина дарҳол рози бўлди. Абу-Даби ҳам кўриб чиқилмоқда. Қаерда учрашиш муҳим эмас, асосийси натижага эришиш.

У Европа интеграциясини асосий масала сифатида тилга олди. Президентнинг сўзларига кўра, “Украина 2027 йилга қадар Европа Иттифоқига қўшилишга техник жиҳатдан тайёргарлик кўриш ниятида.Келажакдаги келишувларда маълум бир санани белгилаш жуда муҳим. Акс ҳолда Россия Европадаги айрим вакиллар орқали жараённи секинлаштиришга уриниши мумкин”.

Зеленский урушни тугатиш режасига имзо чекиш фақат аниқ белгиланган кафолат – хавфсизлик ва Европа нуқтаи назари ҳамда аниқ муддат билан амалга оширилиши мумкинлигини қатъий таъкидлади. Сана ва мажбуриятсиз ҳар қандай келишув шунчаки сиёсий баёнот бўлиб қолиши мумкинлигига урғу берди.

С.Раҳимов, ЎзА