Өзбекстан Республикасының Экономикалық зерттеулер және реформалар орталығы 2025 жылдың бірінші тоқсанына арналған Өзбекстан экономикасының даму болжамын ұсынды. Жалпы ішкі өнімнің (ЖІӨ) қазіргі деңгейін болжау озық талдау әдістері мен халықаралық тәжірибеге негізделген.
Жаһандық мәселелер мен макроэкономикалық белгісіздіктерге қарамастан, Өзбекстан экономикасы 2024 жылы тұрақты және орташа өсімді көрсетті. Қызмет көрсету саласы, өндіріс, құрылыс және жоғары инвестициялық белсенділік негізгі қозғаушы күштерге айналды. 2025 жылдың басында экономикалық белсенділік өсуін жалғастырды.
Оң тенденциялар Іскерлік белсенділік индексінің (ІБИ) өсуімен расталып отыр. 2025 жылдың қаңтарында бұл көрсеткіш өткен аймен салыстырғанда 8,4%-ға артты. ІБИ құрылымында тауар-шикізат биржасында шикізат сатып алу қарқындылығы 33,3%-ға өсіп, белсенді жұмыс істеп тұрған шаруашылық субъектілер саны 1,1%-ға артқаны байқалды.
2025 жылы экономикалық өсудің негізгі факторларының бірі жоғары инвестициялық белсенділік болады. Бұл, әсіресе, жаңартылатын энергетика және көлік инфрақұрылымы саласындағы ірі жобаларды жүзеге асыру, сондай-ақ халықтың нақты табысын арттырумен байланысты.
Тұтыну сұранысын қолдау үшін тұрақты ақша аударымдары, сондай-ақ алтын мен басқа да тауарлар бағасының тұрақтылығы есебінен экспорт көлемінің өсуіне ерекше назар аударылады. Президент төрағалығымен өткен жиында ЖІӨ көлемін 120 млрд доллар, экономикаға бағытталған инвестицияларды 42 млрд доллар, экспорт көлемін 30 млрд долларға жеткізу жоспарланғаны атап өтілді.
Экономикалық зерттеулер және реформалар орталығы қолда бар мәліметтер мен тенденция негізінде 2025 жылдың бірінші тоқсанында Өзбекстанның ЖІӨ өсімі 6,2%-ды құрайтынын болжап отыр. Алдын ала есептеулер бойынша, экономикалық өсім 6%-дан 6,4%-ға дейінгі аралықта болады.
Дүниежүзілік банк 2025 жылы Өзбекстан экономикасының 5,8%-ға өсуін болжаса, Халықаралық валюта қоры ЖІӨ өсімін 5,7% деңгейінде бағалауда. Азия даму банкі 2024 жылдың қыркүйек айында өнеркәсіп және құрылыстағы оң үрдістерді ескере отырып, 2025 жылға арналған Өзбекстанның ЖІӨ өсімін 6,2%-ға дейін көтерді.
Осылайша, апталық мониторинг нәтижелеріне және ішкі және сыртқы факторларды ескере отырып, Орталықтың жасаған болжамы нақты ресми деректер жарияланбай тұрып, ЖІӨ ағымдағы деңгейін бағалауға және болжауға мүмкіндік береді.