Өзбекстанның жаңадан тағайындалған елшісі Абат Файзуллаев Италия президенті Серджо Маттареллаға сенім грамотасын тапсырды.

Италия Президентінің Римдегі ресми резиденциясы Квиринале сарайында өткен салтанатты шара барысында Серджо Маттарелла осы жылдың 9-11 қарашасында Өзбекстанға ресми сапарын еске алып, сапар өзіне ұмытылмас әсер қалдырғанын айтқан.

«Кездесуде екі ел арасындағы стратегиялық диалогты ілгерілетудің жоғары маңыздылығы қуатталып, Өзбекстан мен Италия арасындағы саяси, сауда-экономикалық және мәдени-гуманитарлық ынтымақтастықтың келешегін тиімді пайдалануға екі тараптың да мүдделілігі атап өтілді», делінген хабарламада.

Сұхбат соңында Италия президенті Өзбекстанның бай тарихи-мәдени мұрасы мен өзі аралаған Самарқанд пен Хиуа қалаларындағы көне ескерткіштердің ерекшеліктерін атап өтті.