1 қыркүйек күні Тяньцзинь қаласында Шанхай ынтымақтастық ұйымы саммиті аясында мемлекет және үкімет басшыларының жұбайлары қатысқан мәдени шаралар өтті.

Өзбекстан Республикасының Президенті Шавкат Мирзиёевтің жұбайы Зироат Мирзиёева Қытай Халық Республикасының Төрағасының жұбайы Пэн Лиюань, Түркияның Бірінші ханымы Эмине Ердоған, Әзербайжанның Бірінші ханымы Мехрибан Әлиева, Моңғолияның Бірінші ханымы Лувсандорж Болорцэцэг, Армения Премьер-Министрінің жұбайы Анна Акопян, Непал Премьер-Министрінің жұбайы Радхика Шакья және Камбоджа Премьер-Министрінің жұбайы Пич Чанмонимен бірге Хайхэ өзені бойымен теплоходта серуендеді.

Ұлы Қытай жазығы арқылы ағатын Хайхэ өзені қаланың тарихында ерекше орын алған. Әр дәуірде өзен жағасында астана қауіпсіздігін қорғау үшін қамалдар тұрғызылған.

Бірінші ханымдар осы тарихи қамалдарды аралап көрді. Қонақтар үшін арнайы қойылым ұсынылып, мәдени мұра, дәстүрлі өнер мен тарихты қорғаудың маңыздылығы ерекше атап өтілді. Себебі олар халықтар арасындағы достық пен ынтымақтастықты нығайтуда маңызды рөл атқарады.

Табиғат аясында өткен әңгіме барысында бірінші ханымдар халықтар арасындағы достық байланыстарды бекемдеу мәселелерін талқылады.

Өзбекстанның Бірінші ханымы Тяньцзиньдегі ең ірі көркемөнер және тарихи музейге де барды. Бұл мәдениет ордасы Қытайдағы ең жоғары санаттағы музейлердің бірі саналады. Ол бұрынғы Тарих музейі мен Өнер музейінің экспонаттарын біріктірген. Жаңа ғимаратта көрме залдары, қоймалар және ғылыми-зерттеу орталықтары орналасқан. Музей қорында шамамен 218 мың экспонат бар, олардың басым бөлігі «құнды мәдени жәдігерлер» санатына жатады.

Жоғары мәртебелі қонаққа Тяньцзиньнің тарихи маңызы мен бай мұрасын паш ететін үш негізгі экспозиция – «Көне Тяньцзинь», «Тяньцзиньдегі Қытай мәдениетінің жүз жылы» және «Яоши қазыналары — мәдени асыл мұралардың бірегей көрмесі» ұсынылды.

Музей коллекциясында 60-тан астам сирек өнер туындыларының топтамасы бар, олардың ішінде көне қола бұйымдар, нефриттен жасалған әшекейлер, каллиграфия және бейнелеу өнері үлгілері, сондай-ақ фарфор бұйымдары ерекше орын алады.

Сол күні Зироат Мирзиёева Өзбекстан Президентімен бірге Бейжіңге келді.