Өзбекстанда қоғамдық көліктерде жол ақысын төлеуге автоматтандырылған жүйе операторы ATTO мен Бішкек қоғамдық көлік жүйесінің операторы арасында ынтымақтастық туралы меморандумға қол қойылды.

Бұл туралы АТТО баспасөз қызметі мен Бішкек қалалық әкімдігі хабарлады.

Меморандумның мақсаты – екі елдің қалаларындағы қоғамдық көліктерде төлемдерді өзара қабылдау мүмкіндігін кеңейту.

«Жақын күндері Қырғызстан азаматтары Өзбекстан қалаларында жол ақысын «Тұлпар» картасымен, ал Өзбекстан азаматтары Бішкекте ATTO картасымен төлей алады. Туризмнің белсенді дамып келе жатқан жағдайында мұндай ынтымақтастық екі ел тұрғындарының сапарларын өте жайлы етеді», - делінген АТТО хабарында.

«Тұлпар» – Қырғызстанның Бішкек қаласындағы автоматтандырылған төлем жүйесінің операторы саналады.