Өзбекстан Төтенше жағдайлар министрлігінің құтқарушылары Түркияда болған жойқын жер сілкінісінің үйінділері астында қалған тағы 2 адамды шығарды.

ТЖМ ақпарат қызметінің хабарлауынша, 12 ақпан күні түнгі уақытта Өзбекстан құтқарушылары Түркияның Хатай провинциясында құлаған ғимараттардың астынан тағы екі зардап шегушіні алып шыққан.

«Іздестіру-құтқару жұмыстары басталғалы, яғни 7 ақпаннан бері өзбекстандық құтқарушылар 16 зардап шегушіні құтқарып, 107 қаза тапқан адамның денесін шығарды», делінген хабарламада.

Өзбекстандық құтқарушылар қызметтік иттердің көмегімен 62 жастағы Самет Женко мен 60 жастағы Севал Женконы аман алып қалған. Оларды үйінді астынан шығару процесінде Мексика мен Түркияның құтқарушылары бірлесіп жұмыс істегені айтылған.

Қазір ауданда Өзбекстаннан жіберілген 100 құтқарушы мен Қорғаныс министрлігі жіберген 70-тен астам дәрігер қызмет етуде.