Президент Шавкат Мирзияев жер телімдерін аукцион арқылы сатуды жеңілдету бойынша ұсыныстардың таныстырылымына қатысты.

Дамыған елдерде жер ең жақсы актив және бизнес базасы болып табылады. Соңғы жылдары бұл саладағы ашықтық пен бәсекелестіктің нәтижесінде жер нарықтық активке айналуда. Осы мақсатта 2021 жылдың 15 қарашасында «Ауыл шаруашылығына арналмаған жер учаскелерін жекешелендіру туралы» заң қабылданды. Заңның бұл талаптары Министрлер Кабинетінің осы жылдың 14 ақпанындағы қаулысымен бекітілген.

Содан бері 2022 жылдың ақпан-қазан айларында кәсіпкерлік және қала құрылысы қызметін жүзеге асыру үшін «Yerelektron» ақпараттық жүйесі арқылы 48 мың жер телімі аукционға шығарылды. Заңды және жеке тұлғалардың пайдалануындағы 5 мыңға жуық жер учаскесін жекешелендіру бойынша оң қорытынды берілді.

Сонымен қатар, ағымдағы істерді талдау бұл жүйенің кемшіліктері бар екенін көрсетті. Мәселен, аукционға ұсынылған 12 мыңнан астам жер учаскесі ауыл шаруашылығы мақсатындағы немесе ерекше қорғалатын аумақтарда орналасқаны анықталды. Бос жер телімдерін «Yerelektron» ақпараттық жүйесіне тек құрылыс бөлімдері енгізетіндіктен, барлық бос жатқан жерлерді табу барысы толық қамтылмаған. Сондықтан бұл жұмыстарды облыстық құрылыс басқармалары мен кадастрлық органдар бірлесіп атқарса деген ұсыныс жасалуда.

Тәжірибеде қиындық тудыратын тағы бір мәселе жерді аукционға шығару кезеңінің көптігі. Қазіргі уақытта ол 13 кезеңнен тұрады және жерді жалға алу құқығымен алу үшін 48 жұмыс күні және иелік ету құқығымен 74 жұмыс күні қажет. Сондықтан жерді аукционға қою кезеңдерін 8-ге дейін, ал мерзімін сәйкесінше 16 және 22 жұмыс күніне дейін қысқартуға болатыны айтылды.

Кейбір қалаларда бас жоспардың жоқтығы да үрдісті баяулатуда. Сондықтан, облыстық сәулет және қала құрылысы кеңесімен келісе отырып, осындай орындардағы жерлерді бас жоспар негізінде аукционға шығару ұсынылды.

Шағын индустриялық аймақтардың аумағы айқын. Сондықтан олардағы жерді кәсіпкерлерге бас жоспарда көзделген лоттарға сәйкес қарапайым түрде беру керектігі баса айтылды.

Халықтың пайдаланып отырған жерін жекешелендіріп алуына жақсы мүмкіндік. Қазір бұл төлем жылдық жер салығының 20 есесін құрайды. Мемлекет басшысының кәсіпкерлермен ашық диалогында берген тапсырмасына сәйкес, бұл шама Ташкент және Нөкіс қалалары мен облыс орталықтарында жер салығының 10 есе, қалған облыстарда 5 есе мөлшерінде белгіленді.

Мемлекет басшысы ұсынылған шараларды мақұлдап, тұрғындар мен кәсіпкерлерге жеңілдік жасау, жерді тиімді пайдалануды ұйымдастыру бойынша қосымша тапсырмалар берді.