Өзбекстан Республикасының Орталық банкі биыл қаңтар–қыркүйек айларындағы ішкі валюта нарығына шолу жасады.

Биыл шетел валютасына деген сұраныс көлемі 42,7 миллиард АҚШ долларын құраған. Бұл көрсеткіш өткен жылдың сәйкес кезеңімен салыстырғанда 23,5 пайызға артқан. Осы кезеңде валюта ұсынысының көлемі (Орталық банктің операцияларын есептемегенде) 34,4 миллиард долларға жетіп, 2024 жылмен салыстырғанда 24 пайызға өскен.

Заңды тұлғалар тарапынан валютаға сұраныс 24 пайызға, ал олардың валюта ұсынуы 37 пайызға артқан. Валюта ұсынысының негізгі көздерінің бірі — экспорттан түскен кірістер, биыл осы кезеңінде бұл түсімдер 13 миллиард долларға жеткен.

Банктер арқылы шетелдік несиелер есебінен валюта ұсынысының көлемі 6,3 миллиард долларды құраған, бұл өткен жылмен салыстырғанда 61 пайызға көп.

Жеке тұлғалар банктерге 15,2 миллиард доллар сатқан. Бұл 2024 жылғы көрсеткіштен 1,3 есе артық. Сонымен қатар, жеке тұлғалардың валюта сатып алу көлемі 8,5 миллиард доллар болып, өткен жылмен салыстырғанда 23 пайызға өскен.

Жеке тұлғалар ұсынған валюта көлемі сұраныстан шамамен 6,7 миллиард долларға артық болған.

Қаңтар–қыркүйек айлары аралығында сумның айырбас бағамы 6,4 пайызға нығайған. Сонымен бірге, күнделікті бағам ауытқуы екі есеге артқан.

Орталық банк дерегінше, ішкі валюта нарығында валюта ағымының көбеюі, экспорт пен валюта түсімдерінің өсуі, сондай-ақ импорттың тұрақтануы сумның нығаюына оң әсер еткен.

Суммен есеп айырысу және жинақ жүргізу белсенділігі артқан. Халық пен кәсіпорындардың ұлттық валютаға деген сенімі өсіп, банктердегі ұлттық валютадағы депозиттер 23 пайызға артып, 205 триллион сумға жеткен.

Мамандардың айтуынша, валюта нарығындағы бұл оң үрдіс ел экономикасының тұрақтылығын арттыруға және инвестициялық тартымдылықты күшейтуге ықпал етуде.
Орталық банк алдағы кезеңде де ұлттық валютаның тұрақтылығын сақтап, ішкі нарықтағы валюта ағымдарын теңгерімді ұстау шараларын жалғастыруды жоспарлап отыр.