Өзбекстан Республикасының Мәдениет министрі Озодбек Назарбеков пен Түркия Республикасының Мәдениет және туризм министрі Мехмет Нури Эрсой арасында ынтымақтастық кездесуі өтті.

Кездесудің басында соңғы жылдары Өзбекстан мен Түркия арасындағы ынтымақтастық барлық салалармен қатар, мәдениет және өнер саласында да қарқынды дамып келе жатқаны, бауырлас мемлекеттер арасындағы қарым-қатынас кейінгі бес жылда жедел даму кезеңіне шыққаны айтылды.

– Өзбекстанда өтіп жатқан халықаралық іс-шараларға Түркия өкілдері тұрақты түрде қатысып келеді. Атап айтқанда, биыл маусым айында Зоминде ұйымдастырылған Халықаралық мақам өнері форумына Түркия Президентінің кеңесшісі Ялчын Топчу мырзаның қатысқаны назар аударарлық жайт, – деді Мәдениет министрі О.Назарбеков.

Сондай-ақ, Самарқанд қаласында өтіп жатқан «Шығыс әуендері» халықаралық музыка фестиваліне түркиялық музыкатанушы ғалымдардың қатысуы және халықаралық қазылар алқасында Түркия өкілінің болуы қуанарлық жағдай.

Кездесу барысында Мехмет Нури Эрсой 2025 жылы «Түркия мәдениеті күндерін» Өзбекстанда өткізу туралы ұсыныс жасады.

Кездесу соңында мәдениет және өнер саласындағы ынтымақтастықты одан әрі кеңейту бойынша бірқатар мәселелер келісілді.