2025/2026 оқу жылынан бастап Өзбекстанда сырттай білім беру бойынша қабылдау ресми түрде тоқтатылады.

Бұл туралы «Білім беру сапасын қамтамасыз ету және білім беру қызметтерін көрсету жүйесін жетілдіру жөніндегі қосымша шаралар туралы» Өзбекстан Республикасы Президентінің жарлығы қабылданды.

Аталған құжатқа сәйкес, сырттай оқу формасына қабылдау тоқтатылып, күндізгі оқудан өзге баламалы білім беру түрлеріне арналған қабылдау квоталары кезең-кезеңімен ұлғайтылатын болады.

Сонымен қатар:

• Жоғары білім беру ұйымдарында баламалы білім беру түрлері бойынша жалпы қабылдау квотасы күндізгі оқуға қабылдау нәтижесінің 50 пайызынан аспауы тиіс;
• Магистратура деңгейінде баламалы білім беру нысандарында ғылыми-педагогикалық кадрларды даярлауға рұқсат етіледі;
• Жоғары оқу орындарында баламалы білім берудің кредит-модульдік жүйесіне негізделген оңтайландырылған күндізгі оқыту нысанын (part-time education) енгізуге рұқсат беріледі;
• Баламалы білім беру түрлеріне белгіленген нормадан артық студент қабылдау – лицензиялық талаптар мен шарттарды өрескел бұзу ретінде бағаланады және лицензияны кері қайтаруға негіз болады.

Сондай-ақ, әрбір білім беру ұйымының құрылымында ішкі білім сапасына аудит жүргізуге жауапты ішкі білім сапасын бақылау бөлімдері құрылады.