Өзбекстанда табиғи газ өндіру көлемі 21,7 пайызға қысқарды. Бұл туралы «Узбекнефтгаз» АҚ-да өткен жиында айтылды.

«Узбекнефтгаз» мәліметінше, жиында Мемлекет басшысы белгілеген өзекті міндеттердің орындалуы, қоғам қызметін қалпына келтіру, табиғи газ өндіру көлемдерін тұрақтандыру және өнеркәсіптік өнім өндірісін арттыру мәселелері талданған.

«Жиында соңғы төрт жылда табиғи газ өндіру көлемі 21,7 пайызға қысқарғаны атап өтілді. Бұл жағдай стратегиялық жоспарлаудың жеткіліксіздігі және тек күнделікті міндеттерге ғана назар аударылуымен байланысты екені айтылды. Осыған орай, әрбір кен орнының экономикалық тиімділігі мен рентабельділік деңгейін нақты айқындау қажеттігі баса көрсетілді», делінген хабарламада.

Қоғамның ақпарат қызметінің хабарлауынша, жиында айтылғандай, биыл геологиялық-барлау және техникалық іс-шараларға қомақты қаржы бөлінгеніне қарамастан, өндіріс көлемінде өсім байқалмаған. Керісінше, өндіру қарқынының 5–6 пайызға төмендеуі өзге өнім түрлерін өндіруге де кері әсерін тигізген.

Қазіргі таңда «Узбекнефтгаз» АҚ өндіретін газ келесі кезеңге өзіндік құнынан төмен бағамен жеткізіліп отыр. Бұл компанияның қаржылық тұрақтылығына теріс ықпал етіп, сыртқы қарыздардың артуына себеп болуда.

Жиын қорытындысында саладағы түйткілдерді жою, табиғи газ өндіруді тұрақты дамыту және қор көлемін ұлғайтуға бағытталған нақты ұсыныстар мен бастамалар талқыланды. Осы ұсыныстар негізінде саланы дамытуға арналған кешенді іс-шаралар жоспарын әзірлеу тапсырылды.