Өзбекстанның Науаи облысының Тамды ауданында жел электр станциясын салу жобасы аясында алғашқы жел турбинасы орнатылды.

Энергетика министрлігінің хабарлауынша, Біріккен Араб Әмірліктерінің «Masdar» компаниясымен Науаи облысының Тамды ауданында 500 МВт жел электр станциясының құрылыс жобасы аясында «Goldwind» (Қытай) компаниясының бірінші турбинасы орнатылды.

Оның қуаты 4,7 МВт, биіктігі 97 метр, қанаттарының әрқайсысы 77 метр.

Бұл ірі жоба аясында жалпы 111 жел турбинасын орнату жоспарланған.

Жел электр станциясының алғашқы қуаттары 2023 жылдың соңында іске қосылады және ол Орталық Азиядағы ең ірі станция болады.

Станция толық іске қосылғанда жылына 1 миллиард 800 миллион кВт/сағ электр энергия өндіреді. Соның нәтижесінде жылына 540 миллион текше метр табиғи газ үнемделіп, 720 мың тонна зиянды газдың атмосфераға таралуына тосқауыл қойылады.