«Халал сертификаттау мекемесі» халықаралық «Conformity Assessment: Requirements for Bodies Providing Halal Certification» стандартына сәйкес аккредитациядан өтті.

«Өзбекстан ғылыми-сынақ және сапаны бақылау орталығы» (UzTest) жанындағы «Халал сертификаттау мекемесі» Түркияның Халал аккредитация мекемесі (HAA) тарапынан аккредитациядан өтті.

Аталған мекеме халықаралық стандартқа толық сай деп танылды. Бұл өз кезегінде Өзбекстанда «халал стандарттары» бойынша қызмет атқарып келе жатқан ұйымдар үшін жаңа кезеңнің басталғанын білдіреді.

Бүгінде әлемдік нарықта «халал» стандарттары мен сертификаттарына деген сұраныс артып келеді. Әсіресе экспорт процесінде әрбір өнім түріне сәйкес сертификат талап етіледі, олардың ішінде «Халал сертификаты» маңызды орын алады. Бұл құжат шетелге, соның ішінде Ислам елдерінің стандарттау және метрология институтына (SMIIC) мүше мемлекеттерге өнім экспорттауда техникалық кедергілерді жоюға мүмкіндік береді.

Халықаралық сарапшылардың мәліметінше, «халал» саласы бүгінде әлем экономикасындағы ең жылдам дамып келе жатқан бағыттардың бірі саналады. Қазіргі таңда халал азық-түлік және сусындар индустриясының көлемі 2 триллион АҚШ долларына, ал қажылық және зиярат туризмі көлемі 400 миллиард долларға жетіп отыр.