2030 жылдан бастап Өзбекстанда өндірілген артық «жасыл» электр энергиясы Қазақстан мен Әзербайжан арқылы Еуропаға экспортталмақ.

1 шілде күні Әзербайжанның «Azerenerji» ААҚ, Өзбекстанның «Ұлттық электр желілері» АҚ және Қазақстанның «KEGOC» АҚ өкілдері Бакуде орналасатын «Green Corridor Alliance» ЖШҚ бірлескен кәсіпорнын құру және оның жарғысын бекіту туралы келісімге қол қойды.

Өзбекстанның Ұлттық электр желілері компаниясының хабарлауынша, бұл жоба үш ел үшін энергетикалық қауіпсіздікті қамтамасыз ету, тұрақты даму мақсаттарына жету, және жасыл энергияны Еуропаға экспорттау жолында аса маңызды қадам саналады.

Еске салсақ, 2024 жылғы 13 қарашада, Әзербайжанның Баку қаласында өткен COP-29 халықаралық климат саммиті аясында, Өзбекстан, Қазақстан және Әзербайжан басшылары жасыл энергияны дамыту және тасымалдау саласындағы стратегиялық әріптестік туралы келісімге қол қойған болатын.

Осы келісімге сәйкес, 2030 жылдан бастап Өзбекстанда өндірілген артық жаңартылатын энергия көздері (күн, жел және т.б.) Қазақстан мен Әзербайжан аумағы арқылы Еуропа нарығына жеткізіледі.