Қазіргі таңда Өзбекстан халқының саны 38 миллионға жуықтады. Сарапшылардың болжамынша, 2030 жылға қарай бұл көрсеткіш 41 миллионға жетсе, 2050 жылға дейін ел халқы 50 миллионнан асып түсуі мүмкін. Мұндай демографиялық өсім әлеуметтік даму саясатын қайта қарап, ұзақ мерзімді көрсеткіштерді алдын ала айқындауды талап етеді.

Осыған байланысты 2050 жылға дейінгі демографиялық болжамдарды негізге ала отырып, өңірлердің әлеуметтік даму көрсеткіштерін әзірлеу және сол арқылы аумақтарды әлеуметтік-экономикалық тұрғыдан жүйелі дамыту жөнінде нақты ұсыныстар мен ұсынымдар дайындау көзделіп отыр.

Аталған мәселе Сенаттың Ғылым, білім және денсаулық сақтау мәселелері жөніндегі комитеті мен Біріккен Ұлттар Ұйымының Халық қоры (UNFPA) бірлесіп құрған жұмыс тобының отырысында жан-жақты талқыланды.

БҰҰ Халық қорының мамандары министрліктер мен ведомстволар әлеуметтік-экономикалық көрсеткіштерді қалыптастыру кезінде басым бағыттарды нақты айқындаудың маңызын атап өтіп, демографиялық өзгерістерді ескеруге қатысты бірқатар ұсыныстарын ортаға салды.

Сенаторлар мен салалық мамандар республиканың жекелеген өңірлері мысалында әлеуметтік-экономикалық даму көрсеткіштерін айқындап, сол негізде кешенді зерттеулер жүргізу жөнінде пікір білдірді. Әсіресе әлеуметтік салада халықтың білім беру мен денсаулық сақтау қызметтеріне қолжетімділігін арттыру, сондай-ақ тұрғындарды әлеуметтік қорғау жүйесін нығайту бағытында қол жеткізілуі тиіс көрсеткіштердің өзектілігіне ерекше назар аударылды.

Сонымен қатар, демографиялық өсім еңбек нарығына түсетін жүктемені арттыратыны, осыған орай жаңа жұмыс орындарын құру мен адами капиталды дамыту мәселелерінің күн тәртібіне шығатыны атап өтілді. Мамандар бұл бағыттағы шаралар елдің орнықты дамуын қамтамасыз етуде шешуші рөл атқаратынын жеткізді.