Мемлекет басшысы Шавкат Мирзиёевтің жуырда Сырдария облысына жасаған сапары барысында венгриялық серіктестермен бірлескен жұмысты кеңейту жөнінде берген тапсырмасына сәйкес, Венгрияның Будапешт қаласында Өзбекстан–Венгрия өңіраралық бизнес форумы ұйымдастырылды.

Форум аясында Венгрия Мемлекеттік хатшысының сыртқы экономикалық байланыстар жөніндегі орынбасары, Венгрияның экспортты қолдау агенттігінің бас директоры К. Бихари, Венгрияның халықаралық бизнес байланыстарын дамыту жөніндегі төтенше елшісі, «4iG» басқарма кеңесінің төрағасы Г. Ясай, сондай-ақ «BDPST», «Mol Group» және басқа да компаниялардың басшыларымен кездесулер өтті.

Форумда Өзбекстанның Наманган, Сұрхандария, Бұхара және Сырдария облыстары әкімдерінің орынбасарлары өңірлердің экономикалық әлеуеті туралы таныстырылым жасады.

Венгрияның 20-дан астам ірі компаниясының өкілдері мен 10 өңір басшысы қатысқан бизнес форум аясында B2B және B2G форматындағы келіссөздер өтті.

Форум барысында бірқатар маңызды бағыттар бойынша бірлескен жобаларды жүзеге асыру жөнінде алдын ала келісімге қол жеткізілді.

Атап айтқанда, Венгрияның «Mol Group» компаниясы мен Сұрхандария облысындағы «Surkhon Sandvich» кәсіпорны арасында Өзбекстанда резинамен модификацияланған битум өндіру жобасын іске асыру мәселесі талқыланды.

Венгрияның Зала провинциясы Наманган облысында тоқыма саласындағы инвестициялық жобаларды жүзеге асыру, Секешфехервар провинциясы Бұхара облысында туризм саласындағы бірлескен жобаларды іске асыру, ал Толна провинциясы Сұрхандария облысында жүзім шаруашылығы бағытындағы жобаларды жүзеге асыру бойынша ұсыныстарын білдірді.

Логистика саласында Еуропадағы ең мықты 10 компанияның бірі саналатын Венгрияның «BDPST» компаниясымен Сырдария облысында логистика, банк, қонақ үй және азық-түлік салаларындағы жобаларды іске асыру перспективалары талқыланды.

Венгрияның «Vallis Group» компаниясы Өзбекстанда құрылыс, логистика, білім беру, қонақүй, көпсалалы клиника және спорт жабдықтарын өндіру жобаларына инвестиция салуға дайын екенін мәлімдеді.

«Nagykun 2000 Agricultural» компаниясы Сұрхандария облысының «Музработ» ауданында 2 мың гектар жерге органикалық күріш өсіру, оны қайта өңдеу және балалар тағамын өндіру жобасын іске асыруды ұсынды.

«4iG» компаниясы Өзбекстанда мобильді байланыс және «smart city» жобаларын жүзеге асыруға дайын екенін хабарлады.

Венгрияның құс шаруашылығы саласындағы ТОП-3 компаниясының бірі – «Master Food» Наманган облысының «Үйчи» ауданындағы «Uychiparranda» кәсіпорнымен бірлесіп құс шаруашылығы кешенін дамыту жөнінде келісімге келді.

«Duna Group» компаниясы Өзбекстанның «Avtomagistral» кәсіпорнымен бірлескен кәсіпорын құру, асфальт зауытын салу немесе қолданыстағы зауытты жаңғырту жөнінде ұсыныс білдірді.

Сондай-ақ Бұхара облысындағы «Amirtex» кәсіпорнының тоқыма өнімдерін және Наманган облысындағы «Mexmash» кәсіпорнының бұранда (шуруп) өнімдерін Венгрияға экспорттау жөнінде келісімге қол жеткізілді.