Вена қаласындағы Атом энергиясы жөніндегі халықаралық агенттіктің (АЭХА) штаб-пәтерінде Өзбекстанның «Ядролық залал үшін азаматтық жауапкершілік туралы» Вена конвенциясына қосылуы жөніндегі ресми құжат агенттіктің бас директоры Рафаэль Гроссиге табыс етілді. Кездесу барысында тараптар Ташкенттің ядролық қауіпсіздікке қатысты халықаралық міндеттемелерді жедел қабылдап жатқанын атап өтті.

«Dunyo» ақпарат агенттігінің хабарлауынша, рәсім АЭХА-ның Венадағы орталық кеңсесінде өтті. Агенттік бас директоры Рафаэль Гросси Өзбекстан Президенті Шавкат Мирзиёевпен 2024 жылы Ташкентте өткен кездесуде елдің бірқатар ядролық конвенцияларға қосылу мәселесі талқыланғанын еске салды.

Оның айтуынша, Өзбекстан қысқа мерзім ішінде ядролық саладағы төрт негізгі халықаралық құжатқа қосылды: «Ядролық қауіпсіздік туралы конвенция», «Ядролық немесе радиациялық апат кезінде көмек көрсету туралы конвенция», «Ядролық апат туралы ерте хабарлау туралы конвенция», «Ядролық залал үшін азаматтық жауапкершілік туралы» Вена конвенциясы.

Гроссидің сөзінше, бұл шешімдер ел басшысының жеке назарымен және қолдауымен жүзеге асқан.

Айта кетсек, 2025 жылдың 26 қыркүйегінде Өзбекстанның «Ядролық залал үшін азаматтық жауапкершілік туралы» (Вена, 1963 жылғы 21 мамыр) Вена конвенциясына қосылуы туралы заңы қабылданған. Осы құқықтық негіз аясында Өзбекстан ядролық энергетиканы дамыту, соның ішінде атом электр станциясы мен шағын модульді реакторлар жобаларын ілгерілету бағытында бастамаларды қолға алуда.

Кездесу соңында Рафаэль Гросси Өзбекстанмен белсенді және нәтижелі ынтымақтастығы үшін алғыс білдірді. Ресми құжаттардың күшіне ену тәртібі конвенция талаптарына сәйкес жүзеге асырылады. Бұл қадам Өзбекстанның ядролық қауіпсіздік саласындағы халықаралық беделін арттырып, атом энергиясын бейбіт мақсатта пайдалану жолындағы жауапкершілігін айқындай түсті.