2024 жыл 21 мамырда Өзбекстан Республикасының Сыртқы істер министрі Бахтиёр Саидов Астана қаласында өткен ШЫҰ Сыртқы істер министрлері кеңесінің отырысына қатысты.

СІМ мәліметінше, кездесу Иранның марқұм президенті Ибрагим Раиси мен Иран Сыртқы істер министрі Хосейн Амир Абдуллахиянды бір минут үнсіздікпен еске алумен басталды. 

Министр Беларусь Сыртқы істер министрі Сергей Алейникті Беларусь Республикасының ШЫҰ отбасына толыққанды мүше ретінде қосылуы бойынша барлық рәсімдердің сәтті аяқталуымен құттықтаған.

«Кездесу барысында тараптар алдағы саммитке дайындық барысында ШЫҰ аясындағы ынтымақтастықтың басым аспектілері мен бағыттарына қатысты бірқатар өзекті мәселелерді талқылады. Атап айтқанда, экономикалық ынтымақтастық, қауіпсіздік, көлік-логистика, мәдени-гуманитарлық және басқа да салалар бойынша ашық және сындарлы пікір алмасу болды», делінген хабарламада.

Сонымен қатар Өзбекстанның аймақтық және жаһандық деңгейде ШЫҰ рөлін одан әрі нығайту, оның үлкен әлеуетін тиімді пайдалану, әсіресе Ұйымның кеңеюін жақтайтыны атап өтілген.