Өзбекстан Сыртқы істер министрінің міндетін атқарушы Владимир Норов Конрад Аденауэр атындағы қордың төрағасы Норберт Ламмертпен кездесті.

СІМ хабарлауынша, әңгіме барысында Өзбекстан мен Қор арасындағы түрлі салалардағы ынтымақтастықтың қазіргі жағдайы мен келешегі талқыланды.

Норберт Ламмерт Қор Өзбекстандағы әлеуметтік өмірдің барлық салаларында кең ауқымды реформалар мен жаңаруларды қолдайтынын атап өтті. Қордың жыл сайынғы Азия елдері өкілдеріне арналған конференциясын өткізу орны ретінде Ташкент қаласының таңдалуы – соның айқын дәлелі.

Қор басшысы сапары барысында ӨР Олий Мажлисінің Сенаты мен Заң шығару палатасында өткен келіссөздердің жемісті нәтижелеріне ерекше тоқталды. Осы тұрғыдан алғанда қор мен Өзбекстан парламенті және саяси партиялары арасындағы тығыз ынтымақтастықты нығайту қажеттігі баса айтылды.

Өзбекстан-Германия қарым-қатынастарын нығайтуға бағытталған іс-шаралар кестесі бойынша ұсыныстар қаралды.

Қор төрағасы ынтымақтастықты одан әрі кеңейтуге, соның ішінде тәжірибе алмасу және сапарлар ұйымдастыру тәжірибесін жалғастыруға дайын екенін білдірді.

Экономика, экология, ғылыми зерттеулер, заң шығармашылық қызметін жетілдіру, адам құқықтары мен гендерлік теңдікті қамтамасыз ету, мемлекеттік органдар мен үкіметтік емес ұйымдар қызметкерлерінің біліктілігін арттыру салаларында бірлескен жобаларды жүзеге асыру жөнінде пікір алмасылды.

Журналистердің біліктілігін арттыру бойынша ынтымақтастық орнату, Қордың «Жас журналистерді қолдау» және «Кәсіби журналистерді даярлау» бағдарламаларына Өзбекстанның бұқаралық ақпарат құралдары өкілдерінің қатысуын ұйымдастыруға өзара қызығушылық білдірді.

Келіссөздер барысында өңірлік және жаһандық күн тәртібіндегі өзекті мәселелер де сөз болды, делінген ведомство хабарында.