Ташкент қаласы тағы бір маңызды халықаралық экономикалық алаңға айналды. IV Ташкент халықаралық инвестициялық форумы аясында ұйымдастырылған Өзбекстан – Словакия бизнес-форумы екі ел арасындағы экономикалық ынтымақтастықты жаңа деңгейге көтеруге бағытталған мазмұнды әрі нәтижелі кездесу болды.
Форум аясында Словакия тарапынан келген делегацияның белсенділігі аталмыш елдің Өзбекстанмен сауда-экономикалық байланыстарды тереңдетуге мүдделі екенін анық көрсетті. Бұл жиын бизнес өкілдері үшін өзара тиімді серіктестік орнатуға мол мүмкіндік ұсынды.
Өзбекстан Республикасының Инвестициялар, өнеркәсіп және сауда министрінің орынбасары Шохрух Ғуломов форумда сөйлеген сөзінде, 2024 жылы Өзбекстан мен Словакия арасындағы сауда айналымы 72,5 миллион еуроны құрап, 2023 жылмен салыстырғанда 48,7 пайызға өскенін атап өтті. Бұл өзара ынтымақтастықтың қазіргі қарқыны өте жоғары екенін дәлелдейді.
Бүгінде Өзбекстанда Словакия капиталы қатысқан 19 кәсіпорын жұмыс істеп жатыр. Алайда бұл көрсеткіш екі елдің экономикалық әлеуетін толық ашып бере алмайды. Сондықтан Словакияның бірқатар жетекші компаниялары – AZC, OFZ, Rokosan, Matador және тағы басқалары Өзбекстан нарығындағы қатысуын кеңейтуге айрықша қызығушылық білдіруде.
[gallery-23822]
Олар автомобиль жасау, металлургия, инфрақұрылым, ауыл шаруашылығы, тамақ өнеркәсібі және энергетика салаларында бай тәжірибе мен озық технологияларға ие.
Словакия тарапынан негізінен автоқосалқы бөлшектер мен металл бұйымдары экспортталса, Өзбекстаннан күріш, жеміс-жидек және киім-кешек импорттауға қызығушылық байқалды. Бұл өз кезегінде Өзбекстан экспортының 54,8 пайызға артуына, ал импорттың 3,5 пайызға төмендеуіне ықпал етеді деп болжануда.
Форум барысында B2B және G2B форматтарында тікелей келіссөздер ұйымдастырылып, 15 жоба бойынша құжаттарға қол қойылды. Олар қатарында машина жасау, фармацевтика, химия өнеркәсібі, көлік пен инфрақұрылым, құрылыс материалдары, ауыл шаруашылығы, энергетика, азық-түлік өнеркәсібі, ақпараттық технологиялар, денсаулық сақтау, металлургия бар.
суреттерді түсірген Р.Назарматов, ӨзА