Өзбекстан Республикасының Сыртқы істер министрлігі қырғыз-тәжік шекарасында орын алған атыс жағдайына байланысты мәлімдеме жасады.

СІМ хабарында, Өзбекстан тарапы қырғыз-тәжік мемлекеттік шекарасындағы жағдайдың ушығуына қатты алаңдаушылық білдіргені айтылған.

«Біз тараптарды қақтығысты тез арада тоқтатуға, жағдайды тұрақтандыру үшін бірлескен шаралар қабылдауға және қақтығыстың одан әрі өршуіне әкелуі мүмкін әрекеттерден аулақ болуға шақырамыз. Бүгінгі таңда барлық мәселелер мен бар проблемалар тек Орталық Азияның бауырлас халықтарына тән ғасырлар бойғы достық, тату көршілік және серіктестік қатынастары рухындағы келіссөздер мен консультациялар арқылы шешілуі керек», - делінген.

Өз кезегінде, Өзбекстан тарапы жағдайды тезірек шешу үшін барлық көмектерді беруге дайын екенін айтқан.