Президент Шавкат Мирзиёев Ташкент облысына сапары барысында Шыршық химия-өнеркәсіптік технопаркінде болды.

Бұл технопарк Татарстан Республикасымен бірлесіп өткен жылдың 23 наурызында ашылған болатын. Бүгінде құны 10 миллион доллардан асатын 5 кәсіпорын іске қосылды. Биылғы жылдың соңына дейін құны 18 миллион долларды құрайтын тағы 8 жоба жүзеге асырылмақ.

Атап айтқанда, көбікті полипропилен бұйымдарын шығаруды «Родиум Полимер» жауапкершілігі шектеулі серіктестігі қолға алған. Кореялық кәсіпкерлермен бірлесіп жүзеге асырған бұл кәсіпорын жылына 2000 тонна өнім шығарып, 2 миллион доллардың экспортын құрайды.

Осы жерде Ташкент облысындағы жаңа индустриялық, қызмет көрсету және әлеуметтік сала кешендерінің іске қосылу салтанаты өтті. Олар Ахангаран ауданындағы «Ташкент Конч Цемент», Төменгі Шыршық ауданындағы «Ташкент Коттон Текстиль», Жоғарғы Шыршық ауданындағы «Азия Ташкент Текстиль», «Салюбрис Вита», Ангрендегі «Ангрен каолин», «Централ Азия Кемикалс», Нурафшондағы «Агро Нью Дрип», Шыршықтағы «Шарқ Тюбс», Паркент ауданында «Самсарак Файз» және «Шабнам Елегант». Бұл зауыттарда цемент, иірілген жіп, тоқыма, фармацевтикалық өнімдер, байытылған каолин, химиялық өнімдер, тамшылатып суару шлангілері, түсті металдар шығарылады. Жалпы бұл кәсіпорындарда 3 мыңнан астам жаңа жұмыс орны ашылады.

Мемлекет басшысы символикалық түймені басып, жаңа кәсіпорындарды іске қосты.

Содан кейін Мемлекет басшысының төрағалығымен кедейлікті азайту, халықты жұмыспен қамтамасыз ету және жергілікті бюджет кірісін арттыру шараларына арналған бейне селекторлық кеңес өтті. Бейнебайланыс арқылы Қарақалпақстан Республикасы басшылығы, барлық облыс, аудан әкімдері де қатысты.

Ташкент облысына тартылған тікелей шетелдік инвестиция көлемі өткен жылы 135 пайызға артып, 480 миллион долларды құрағаны атап өтілді. Сондай-ақ соңғы жарты жылда инвестициялық бағдарламалар аясында құны 240 миллион долларды құрайтын 322 жоба іске қосылып, 8 мың жұмыс орны ашылды.

Бірақ кейбір аудандар мен қалаларда шағын және орта жобалармен шектеліп жатыр. Мәселен, «Орташыршық», «Чиназ», «Қыбрай», «Ташкент», «Янгиёл» аудандары мен «Нурафшан» қаласында бірде-бір ірі жоба жоқ.

Сондықтан әрбір аудан, қала әкіміне жыл соңына дейін кемінде 100 миллион доллар тікелей инвестиция тарту міндеті жүктелді.

Биылғы жылдың алты айында облыста 440 миллион доллардың экспорты жасалған. Өнеркәсіп пен қызмет көрсету саласының көрсеткіштері де өсті. Бірақ кейбір аудандар мен қалаларда ол төмендеген. Биыл құрылысы жоспарланған 114 көпқабатты үйдің тек 9-ы ғана пайдалануға берілген.

Осыған байланысты қателік жіберген бірқатар басшылар қызметінен босатылды.

Президент елді мекендердегі салық базасын кеңейту үшін қолда бар мүмкіндіктерді көрсетті. Әрбір кәсіпкердің мәселесін шешуге жеке салық жинаушы жауапты болатыны айтылды. Салық органдарын сыбайлас жемқорлықтан ада құрылымға айналдырып, олардың қызметкерлерінің моральдық-адамгершілік келбетін арттырудың маңыздылығы сөз болды.

Халықты жұмыспен қамтамасыз ету және жеңілдікті ресурстарға қол жеткізуді жеңілдету шаралары белгіленді. Осыған орай, қазір өзін-өзі жұмыспен қамтығандардың шағын және орта бизнеске көшуіне әкімнің көмекшілері көмектеседі.

Ол үшін Жапония тәжірибесі негізінде аймақтарда бизнес-инкубаторлар мен акселераторлар жүйесі енгізіледі. Бұл жағдайда әлеуетті кәсіпкерлерге бастапқы айналым қаражаты үшін «меншікті» капитал беріледі.

«20 мың кәсіпкер – 500 мың білікті маман» бағдарламасы негізінде 400 мың адамды жұмыспен қамту бастамасы қолдау тапты.

Жиын соңында мүдделі министрліктер мен ведомстволар, өңір басшыларының ақпараты тыңдалды.