Өзбекстан Республикасының Президенті Шавкат Мирзиёев Азия инфрақұрылымдық инвестициялар банкі Басқарушылар кеңесінің жиынына қатысып жатқан Қатар мемлекетінің қаржы министрі Әли бин Ахмад әл-Қувари бастаған делегацияны қабылдады.

Кездесу барысында Әли әл-Қувари Өзбекстан басшысына Қатар Әмірі шейх Тамим бин Хамад Әл Тәнидің сәлемі мен ең ізгі тілектерін жеткізді.

Екіжақты, ең алдымен, сауда-экономикалық саладағы өзара тиімді ынтымақтастықты одан әрі кеңейту мәселелері талқыланды.

«Жасыл» энергетика, көлік, денсаулық сақтау, туризм, инфрақұрылымды дамыту және басқа да салалардағы жобаларды ілгерілету маңыздылығы атап өтілді.

Жыл соңына дейін Доха қаласында Үкіметаралық комиссияның отырысы мен бірлескен бизнес форум өткізу жоспарланғаны айтылды.

Мәдени-гуманитарлық алмасуды жандандыру мәселелеріне назар аударылды.