4 наурызда Исламабад қаласында Өзбекстан Республикасы Президенті Шавкат Мирзияев Пәкістан Ислам Республикасының Президенті Ариф Алвимен кездесті.

Президенттер бір-біріне жылы лебіздерін білдіріп, Өзбекстан мен Пәкістан арасындағы стратегиялық серіктестік барлық бағыттар бойынша дамып келе жатқанын шынайы атап өтті.

Кездесуде Өзбекстан Президентінің Пәкістанға мемлекеттік сапарының тарихи маңызы және ынтымақтастықты одан әрі кеңейту үшін қуатты серпін екені айтылды.

2022 жылы елдеріміз маңызды датаны – дипломатиялық қарым-қатынастардың орнағанының 30 жылдығын атап өтеді. Өткен кезеңде саяси диалог пен ынтымақтастықта үлкен жетістіктерге қол жеткізілді. Екіжақты сауданың қарқынды өсуі байқалады. Өткен жылы пандемияға қарамастан оның көлемі 50 пайыздан астам өсті.

Кездесуде сауда-экономикалық және инвестициялық байланыстарды кезең-кезеңімен кеңейтудің өзекті мәселелері талқыланды.

Мемлекет басшылары Пәкістанға мемлекеттік сапары барысында қол жеткізілген келісімдерді құптады. Сонымен бірге, ынтымақтастықты, оның ішінде гуманитарлық салада кеңейту үшін үлкен әлеует бар екені сөз болды.

Мемлекет басшысы Өзбекстан мен Пәкістанның ғылым, білім, жоғары технологиялар және жастар саясаты салаларындағы бастамалары еліміздің Үшінші қайта өрлеу дәуірінің іргетасын қалаудағы мақсаттарымен үндес екені атап өтті.

Тараптар серіктестіктің осы саласын толығымен дамытуға дайын екендіктерін қуаттады. Өзбекстан Президенті астрономия, астрофизика, физика, математика, вирусология және робототехника салаларындағы ғылыми-тәжірибелік іс-шараларды жүргізуде Ислам Ынтымақтастығы Ұйымының «КОМСТЕК» ғылыми-техникалық ынтымақтастық жөніндегі тұрақты комиссиясының мүмкіндіктерін пайдалануды ұсынды.

Сонымен қатар, тараптар өңірлік және халықаралық маңызы бар мәселелер бойынша пікір алмасты. Аймақтық қауіпсіздік пен Ауғанстандағы жағдайға ерекше назар аударылды.

Шавкат Мирзияев Ариф Алвиге қонақжайлылығы үшін алғыс айтып, келе жатқан ұлттық мереке – Пәкістан күнімен шын жүректен құттықтап, ізгі тілектерін білдірді және оны қолайлы уақытта Өзбекстанға сапармен келуге шақырды.

Кездесу жылы және достастық көңіл-күйде өтті. Тараптар көп қырлы қарым-қатынастарды одан әрі кеңейтуге бел байлағандарын қуаттады.

Осымен Өзбекстан Президентінің Пәкістанға мемлекеттік сапары аяқталып, Шавкат Мирзияев Ташкентке қайтып оралды.