Өзбекстан Республикасының Президенті Шавкат Мирзиёев 7 сәуір күні Парламентаралық одақтың 150-жылдығына арналған Ассамблея аясында Үндістан Республикасының Парламенті төменгі палатасы — Лок Сабха Спикері Ом Бирла бастаған делегацияны қабылдады.

Кездесу басында спикер Мемлекет басшысына Үндістан Премьер-Министрі Нарендра Модидің сәлемін және ізгі тілектерін жеткізді.

Кездесуде Өзбекстан мен Үндістан арасындағы стратегиялық серіктестікті одан әрі кеңейту мәселелері талқыланды.

Тараптар көпқырлы ынтымақтастықтың дәйекті дамып келе жатқанын атап өтті. Соңғы жылдары өзара тауар айналымы тұрақты өсіп келеді, табысты кооперациялық жобалар саны артуда, тікелей әуе қатынастары кеңеюде.

Энергетика, денсаулық сақтау, фармацевтика, IT, ауыл шаруашылығы сияқты салаларда бірлескен жобалар іске асырылуда.

Бүгінде Өзбекстанда Үндістанның 4 университетінің филиалдары жұмыс істеп тұр.

Сұхбат барысында парламентаралық алмасуларды жандандыру, салалық комитеттер деңгейінде белсенді байланыс орнату, достық топтары мен жастар платформаларын құру, сондай-ақ екі елдің өңірлік әлеуетін тиімді пайдалану қажеттігі ерекше атап өтілді.