14 қыркүйекте Өзбекстан Республикасы Президенті Шавкат Мирзияев Халықаралық қаржы корпорациясының басқарушы директоры Махтар Диоп бастаған делегацияны қабылдады.

Кездесу басында Мемлекет басшысы құрамына ХҚК кіретін Дүниежүзілік банк тобымен тиімді ынтымақтастық тұрақты түрде дамып келе жатқанын және стратегиялық серіктестік нығаюда екенін айтты.

Ашық және сындарлы диалог, ынтымақтастықты сапалы жаңа деңгейге көтеруге өзара ұмтылыстың арқасында Дүниежүзілік банкпен Өзбекстандағы бірлескен жобалар портфелі 5 миллиард долларға жетті және экономиканың барлық басым секторларын қамтыды.

2016 жылы ХҚК Өзбекстанда жұмысын қайта бастады. Осы кезеңде корпоративтік операциялардың көлемі үш есеге артып, 200 миллион долларға жетті.

Бүгінде мемлекеттік-жекеменшік әріптестікті дамыту, көлік секторын жаңғырту, банк секторын трансформациялау, микроқаржы институттарын реформалау, тоқыма өнеркәсібіне халықаралық стандарттарды енгізу және басқа да салаларда маңызды жобалар жүзеге асырылуда.

Келіссөздер барысында денсаулық сақтау мен білім беру саласындағы реформаларды қолдау, оның ішінде сектордағы басқаруды жақсартуға және цифрландыруға бағытталған бағдарламаларда ХҚК-нің қатысуын кеңейтуге ерекше назар аударылды.

Сонымен қатар, кәсіпкерлік саласында бизнесті қаржыландырудың тиімді тетіктерін енгізу, мемлекеттік кәсіпорындарды жекешелендіру және мемлекеттік-жекеменшік әріптестікті дамыту бойынша ынтымақтастық, сондай-ақ Өзбекстанда «жасыл технологияларды» енгізу, инновациялық энергетика мен ауыл шаруашылығындағы жобаларға қолдау маңызды екендігі сөз болды.

Кездесу соңында бірлескен «жол картасын» дайындауға және тұрақты түрде сараптамалық кездесулер өткізуге келісілді.