Өзбекстан Республикасы Президенті Шавкат Мирзияев 13 маусымда Америка Құрама Штаттары Орталық қолбасшылығының қолбасшысы генерал Майкл Курилла бастаған делегацияны қабылдады.

Сұхбат барысында тараптар Өзбекстан мен АҚШ арасындағы стратегиялық серіктестікті одан әрі дамыту және көп қырлы ынтымақтастықты кеңейту, аймақтық қауіпсіздік саласындағы практикалық байланыстарды жалғастыру мәселелерін талқылады.

Ауғанстанда бейбітшілік пен тұрақтылықты қамтамасыз ету және әлеуметтік-экономикалық қалпына келтіруге, оның ішінде басым инфрақұрылымдық жобаларды іске асыруға жәрдемдесетін бастамалар мен бағдарламаларды ілгерілетуге ерекше назар аударылды.