Жуырда Ташкент қаласында Өзбекстан – Пәкістан бизнес форумы өтті. Іс-шара Өзбекстан Сауда-өнеркәсіп палатасы мен Пәкістанның Равалпинди Сауда-өнеркәсіп палатасының бірлесіп ұйымдастыруымен өткізілді.

Форумға өнеркәсіп, ауыл шаруашылығы, фармацевтика, тоқыма, логистика, құрылыс, ақпараттық технологиялар және туризм салаларында қызмет атқаратын 300-ге жуық кәсіпкер қатысты.

Конференцияны Өзбекстан Сауда-өнеркәсіп палатасы төрағасының кеңесшісі Алишер Шайхов, Равалпинди Сауда-өнеркәсіп палатасының президенті Умар Шавкат және өзге де жауапты тұлғалар кіріспе сөзбен ашты.

Тараптар экономикалық байланыстарды дамыту, бірлескен жобаларды кеңейту және тікелей серіктестікті нығайту қажеттігін атап өтті. Форум барысында Өзбекстанның инвестициялық мүмкіндіктері мен шетелдік инвесторлар үшін жасалған қолайлы жағдайлар жөнінде таныстырылымдар өтті.

Форум аясында B2B және B2G форматтарында кездесулер ұйымдастырылып, бірлескен өндіріс, сауда және инвестициялық жобаларды жүзеге асыру бойынша келісімдерге қол жеткізілді.

Іс-шара соңында Өзбекстан Сауда-өнеркәсіп палатасы мен Равалпинди Сауда-өнеркәсіп палатасы арасында, сондай-ақ Равалпинди Сауда-өнеркәсіп палатасы мен «Sky Electric», «Caraway Pharmaceuticals» пен «Perfect Future Medicine», «Neutrics Global (Pvt) Ltd» мен «ANT Group», «Pak World Trade & Expo Centre» және «BMCA» арасындағы ынтымақтастық туралы бірқатар меморандумдарға қол қойылды.

Бұл құжаттар екі елдің кәсіпкерлері арасындағы ұзақ мерзімді стратегиялық серіктестікті орнатып, экономикалық байланыстарды одан әрі кеңейтуге қызмет етеді. Форум барысында талқыланған бастамалар өзара сауда айналымын ұлғайтуға және жаңа бірлескен өндіріс орындарын ашуға мүмкіндік береді. Сондай-ақ бұл шара Өзбекстан мен Пәкістан арасындағы экономикалық серіктестікті жаңа деңгейге көтерудің маңызды қадамы ретінде бағаланды.