Ташкентте өтіп жатқан Парламентаралық одақтың 150-жылдық мерейтойлық Ассамблеясы аясында Өзбекстан мен Вьетнам арасында денсаулық сақтау саласындағы ынтымақтастықты тереңдетуге бағытталған маңызды кездесу өтті.

Өзбекстан денсаулық сақтау министрінің орынбасары Фаррух Шарипов елімізге Вьетнам делегациясы құрамында келген Вьетнам Денсаулық сақтау министрінің орынбасары Тран Ван Туанмен кездесу өткізді. Кездесуде қонақтарға Өзбекстанда жүргізіліп жатқан денсаулық сақтау жүйесінің трансформациясы туралы жан-жақты ақпарат берілді.

Атап айтқанда, халықтың барлық қабатын білікті медициналық қызметпен қамту, мемлекеттік медициналық сақтандыру жүйесін енгізу, бастапқы буынды жетілдіру, жоғары мамандандырылған медициналық көмекті халыққа жақындату және саланы цифрландыруға ерекше көңіл бөлініп жатқаны атап өтілді.

Кездесу барысында соңғы жылдары Өзбекстан мен Вьетнам арасындағы көпжақты қатынастар қарқынды дамып келе жатқаны, әсіресе денсаулық сақтау саласындағы екіжақты әріптестікті жаңа деңгейге көтеруге кең мүмкіндік бар екендігі ерекше айтылды.

Келіссөздер нәтижесінде денсаулық сақтау саласындағы өзара әріптестікті кеңейтуге бағытталған екіжақты Өзара түсіністік туралы меморандумға қол қойылды.

Аталған құжатта саланы цифрландыру, мамандар даярлау, фармацевтика, жоғары технологиялық операцияларды енгізу, академиялық алмасу, медициналық білім беру сияқты бірқатар бағыттарда ынтымақтастықты кеңейту көзделген.

Сондай-ақ халық медицинасы бойынша тәжірибе алмасу, жұқпалы емес ауруларды бақылау стандарттарын жетілдіру, ғылыми-зерттеу нәтижелері мен инновациялық технологияларды енгізу, медицина мамандарына Өзбекстан мен Вьетнамда семинарлар, шеберлік сабақтары мен оқу курстарын өткізу, дәрілік заттар мен вакциналарды тіркеу тәртібі туралы ақпарат алмасу сынды маңызды мәселелер қамтылған.